లక్నో: ఒక యువకుడు పొరుగింటి బాలికపై అత్యాచారానికి పాల్పడ్డాడు. ఆమె గర్భం దాల్చడంతో ఈ విషయం బాలిక తండ్రికి తెలిసింది. (Man Rapes, Impregnates Teen) పోలీసులకు ఫిర్యాదు చేయడంతో ఆ యువకుడ్ని అరెస్ట్ చేశారు. ఉత్తరప్రదేశ్లోని ఘజియాబాద్ జిల్లాలో ఈ సంఘటన జరిగింది. మురాద్నగర్ ప్రాంతానికి చెందిన 13 ఏళ్ల బాలిక ఆరో తరగతి చదువుతున్నది. ఆమె తల్లి భర్తతో గొడవ పడి పుట్టింటికి వెళ్లింది. దీంతో తండ్రితో కలిసి ఆ బాలిక ఉంటున్నది.
కాగా, బాలిక తండ్రి పనికి వెళ్లినప్పుడు పొరుగింటికి చెందిన 20 ఏళ్ల యువకుడు ఆమె ఇంటికి వెళ్లేవాడు. ఇంట్లో ఒంటరిగా ఉన్న బాలికను లోబరుచుకుని పలుమార్లు అత్యాచారానికి పాల్పడ్డాడు. ఈ విషయాన్ని ఎవరికీ చెప్పవద్దని బెదిరించాడు.
మరోవైపు ఆదివారం తీవ్ర కడుపు నొప్పితో బాధపడిన ఆ బాలిక స్పృహతప్పి పడిపోయింది. తండ్రి ఆమెను ప్రైవేట్ ఆసుపత్రికి తీసుకెళ్లగా గర్భం దాల్చినట్లు వైద్య పరీక్షలో తేలింది. దీంతో జరిగిన దాని గురించి ఆ బాలిక చెప్పింది. ఆమె తండ్రి పోలీస్ స్టేషన్లో ఫిర్యాదు చేశాడు. ఈ నేపథ్యంలో 20 ఏళ్ల పొరుగింటి యువకుడ్ని పోలీసులు అరెస్ట్ చేశారు. పోక్సో చట్టంతోపాటు పలు సెక్షన్ల కింద కేసు నమోదు చేసి దర్యాప్తు చేస్తున్నారు.