న్యూఢిల్లీ: ఇటీవల విమానాల్లో ప్రయాణికుల మూత్ర విసర్జన, ఎమర్జెన్సీ విండో తెరిచిన సంఘటనలు కలకలం రేపాయి. ఈ తరుణంలో ఒక వ్యక్తి ‘గుట్కా ఉయ్యాలి, విమానం విండో తెరుస్తారా?’ అంటూ ఎయిర్ హోస్టెస్ను అడిగాడు. దానికి ఆమె స్పందించిన తీరుకు సంబంధించిన వీడియో క్లిప్ సోషల్ మీడియాలో వైరల్ అయ్యింది. ఇండిగో ఎయిర్లైన్స్ విమానంలో ఈ సంఘటన జరిగింది. ఒక వ్యక్తి విమానంలో ప్రయాణించాడు. విమానం విండో చివరివైపు సీటులో అతడు కూర్చొన్నాడు. చేతిలో గుట్కా వంటిది నలుపుతూ ఎయిర్ హోస్టెస్ను పిలిచాడు. ‘నేను గుట్కా ఉమ్మివేయాలి, దయచేసి విమానం కిటికీ తెరుస్తారా?’ అని ఆమెను అడిగాడు.
కాగా, ఆ వ్యక్తి మాటలకు ఆ ఎయిర్ హోస్టెస్తోపాటు విమానంలోని ఇతర ప్రయాణికులు తెగ నవ్వుకున్నారు. ఈ రిక్వెస్ట్ చేసిన ఆ వ్యక్తి కూడా చిలిపిగా నవ్వడంతో అతడు తమాషా చేసినట్లు అంతా భావించారు. దీంతో అందరూ దీనిని ఫన్నీగా తీసుకున్నారు. గోవింద్ శర్మ అనే ఇన్స్టాగ్రామ్ యూజర్ ఈ వీడియో క్లిప్ను పోస్ట్ చేశారు. ‘మీ గుట్కా ప్రేమికుడ్ని ట్యాగ్ చేయండి’ అని అందులో పేర్కొన్నారు. దీంతో ఈ వీడియో క్లిప్ సోషల్ మీడియాలో వైరల్ అయ్యింది.