హాస్పిటల్‌ ఆపరేషన్‌ థియేటర్‌లో.. మహిళా రోగికి లైంగిక వేధింపులు

గురువారం ఉదయం ఆమెకు శస్త్రచికిత్స నిర్వహించారు. ఈ సందర్భంగా మత్తులో ఉన్న ఆ మహిళను ఒక వ్యక్తి లైంగికంగా వేధించాడు.

కోల్‌కతా: ప్రముఖ హాస్పిటల్‌ ఆపరేషన్‌ థియేటర్‌లో మహిళా రోగి పట్ల ఒక వ్యక్తి అసభ్యకరంగా ప్రవర్తించాడు. ఆమెను లైంగికంగా వేధించాడు. బాధితురాలి ఫిర్యాదుతో కేసు నమోదు చేసిన పోలీసులు దీనిపై దర్యాప్తు చేస్తున్నారు. పశ్చిమ బెంగాల్‌ రాజధాని కోల్‌కతాలో ఈ సంఘటన జరిగింది. 39 ఏళ్ల మహిళ పిత్తాశయ శస్త్రచికిత్స కోసం కోల్‌కతాలోని ప్రసిద్ధ సూపర్ స్పెషాలిటీ హాస్పిటల్‌లో అడ్మిట్‌ అయ్యింది. గురువారం ఉదయం ఆమెకు శస్త్రచికిత్స నిర్వహించారు. ఈ సందర్భంగా మత్తులో ఉన్న ఆ మహిళను ఒక వ్యక్తి లైంగికంగా వేధించాడు. ఆమె ఛాతి, ప్రైవేట్‌ భాగాలను చేతితో తడమడంతోపాటు గట్టిగా నొక్కాడు. అనస్థీషియా వల్ల పాక్షిక స్పృహలో ఉన్న ఆ మహిళ ఆ వ్యక్తి చర్యలను అడ్డుకోలేకపోయింది. ఆ సమయంలో ఆపరేషన్‌ థియేటర్‌లో మహిళా సిబ్బంది ఎవరూ లేరని ఆమె తెలిపింది. ఈ సంఘటనపై ఫూల్‌బగన్ పోలీస్‌స్టేషన్‌లో ఫిర్యాదు చేసింది.

కాగా, మహిళా రోగి ఫిర్యాదుపై శుక్రవారం కేసు నమోదు చేసిన పోలీసులు ఈ సంఘటనపై దర్యాప్తు చేస్తున్నారు. ఆ మహిళకు వైద్య పరీక్షలు కూడా నిర్వహించారు. అయితే ఈ ఆరోపణలపై ఆ ప్రైవేట్‌ ఆసుపత్రి ఇంత వరకు స్పందించలేదు.