Canada PM | ట్రూడో ప్రేమాయణంపై ఊహాగానాలకు తెర.. ఇన్‌స్టాలో ఫొటోలు పంచుకున్న పెర్రీ

Canada PM | అమెరికాకు చెందిన పాప్ సింగర్ (Pop Singer) కేటీ పెర్రీ (Katy Perry), కెనడా మాజీ ప్రధాని (Ex PM) జస్టిన్ ట్రూడో (Justin Trudeau) మధ్య ప్రేమాయణంపై వస్తున్న ఊహాగానాలకు తెరపడింది.

Canada PM : అమెరికాకు చెందిన పాప్ సింగర్ (Pop Singer) కేటీ పెర్రీ (Katy Perry), కెనడా మాజీ ప్రధాని (Ex PM) జస్టిన్ ట్రూడో (Justin Trudeau) మధ్య ప్రేమాయణంపై వస్తున్న ఊహాగానాలకు తెరపడింది. తమ రిలేషన్‌షిప్‌ను కేటీ పెర్రీ అధికారికంగా ప్రకటించారు. తన ఇన్‌స్టాగ్రామ్ ఖాతాలో జస్టిన్ ట్రూడోతో కలిసి ఉన్న పలు ఫోటోలను షేర్ చేశారు. తమ ప్రేమ బంధాన్ని ప్రపంచానికి తెలియజేశారు.

ఇటీవల జపాన్‌లో పర్యటించిన ఈ జంట అక్కడ ఫొటోలు దిగింది. ఆ ఫోటోలను పెర్రీ పంచుకుంది. ఒక ఫొటోలో ఇద్దరూ చాలా సన్నిహితంగా ఒకరినొకరు హత్తుకుని సెల్ఫీ తీసుకున్నారు. మరొక వీడియోలో ఇద్దరూ కలిసి భోజనం చేస్తున్న దృశ్యాలు ఉన్నాయి. పెర్రీ పోస్ట్‌కు ‘టోక్యో టైమ్స్ ఆన్ టూర్ అండ్ మోర్’ అని కేటీ పెర్రీ క్యాప్షన్ ఇచ్చారు.

ఈ పరిణామం జరగడానికి కొద్ది రోజుల ముందే జస్టిన్ ట్రూడో, కేటీ పెర్రీతో కలిసి జపాన్ మాజీ ప్రధాని ఫుమియో కిషిదా, ఆయన భార్య యూకోను కలిశారు. ఈ భేటీ తర్వాత కిషిదా ఎక్స్‌లో ఒక పోస్ట్ చేశారు. అందులో కేటీ పెర్రీని ట్రూడో భాగస్వామి అని సంబోధించారు. కెనడా మాజీ ప్రధాని జస్టిన్ ట్రూడో తన భాగస్వామితో కలిసి జపాన్ వచ్చారని పేర్కొన్నారు.

తామిద్దరం కలిసి ద్వైపాక్షిక సంబంధాలను బలోపేతం చేయడానికి కృషి చేశామని, ఆ స్నేహం ఇలా కొనసాగుతుండటం సంతోషంగా ఉందని కిషిదా పేర్కొన్నారు. కాగా కేటీ పెర్రీ, జస్టిన్ ట్రూడో తొలిసారిగా గత అక్టోబర్ 25న పారిస్‌లో కేటీ పుట్టినరోజు సందర్భంగా జంటగా కనిపించారు. అంతకుముందు జూలైలో కెనడాలో తమ పెంపుడు కుక్కలతో కలిసి వాకింగ్ చేస్తూ కెమెరా కంటపడ్డారు.