Visit:
శ్రీనగర్‌: జమ్ముకశ్మీర్‌లో (Jammu Kashmir) ఉగ్రవాదులు మళ్లీ రెచ్చిపోతున్నారు. భారత సైన్యంపై వరుగా దాడులకు పాల్పడుతున్నారు. సోమవారం ఉదయం రాజౌరీ జిల్లా గుంధ్వఖవాస్‌ ప్రాంతంలో సెక్యూరిటీ పోస్టుపై కాల్పులకు తెగబడ్డారు. అయితే ఉగ్ర దాడిని భారత సైన్యం సమర్థవంతంగా తిప్పికొట్టింది. అంతేకాకుండా ఉగ్రవాదుల ఏరివేత కోసం భారీస్థాయిలో ఆపరేషన్ చెపట్టింది. అయితే టెర్రరిస్టుల కాల్పుల్లో ఓ జవాన్‌ గాయపడ్డారు. ఆర్మీ చీఫ్ జనరల్ ఉపేంద్ర ద్వివేది శనివారం జమ్ముకశ్మీర్‌లో భద్రతా పరిస్థితులను సమీక్షించిన మరుసటి రోజే ఈ ఘటన జరగడం గమనార్హం.
కాగా, రాజౌరీలోని ఓ గ్రామంలో ఉగ్రవాదులు ప్లాన్ చేసిన భారీ స్థాయి దాడిని సైన్యం తిప్పుకొట్టిందని సైనిక ప్రతినిధి లెఫ్టినెంట్ కల్నల్ సునీల్ భర్త్‌వాల్ తెలిపారు. ప్రస్తుతం ఆ ప్రాంతంలో ఎదురుకాల్పులు కొనసాగుతున్నాయని చెప్పారు. ఈ దాడి సోమవారం ఉదయం 4 గంటలకు జరిగినట్లు వెల్లడించారు.
ఈ నెల 19న కశ్మీర్‌లోని కెరన్‌ సెక్టార్‌లో నియంత్రణ రేఖ వద్ద చొరబాటుకు ప్రయత్నించిన ఇద్దరు ముష్కరులను భద్రతా బలగాలు మట్టుబెట్టిన విషయం తెలిసిందే. ఇక గత గురువారం తెల్లవారుజామున 2 గంటల సమయంలో దోడా జిల్లాలో జడ్డన్ బాటా గ్రామంలోని తాత్కాలిక సైనిక క్యాంప్‌పై ఉగ్రవాదులు దాడి చేశారు. ఈ ఘటనలో ఓ జవాను తీవ్రంగా గాయపడ్డారు. ఈ నెలలో కథువా జిల్లాలోని మచేడీ అటవీ ప్రాంతంలో జరిగిన ఉగ్రదాడిలో ఐదుగురు జవాన్లు మరణించిన విషయం తెలిసిందే. మరో ఐదుగురు గాయపడ్డారు.
