INDIA Bloc | ఇండియా బ్లాక్ కూటమిలో విబేధాలు.. సుప్రీంకోర్టులో పిటిషన్‌కు దూరంగా ప్రధాన పార్టీలు

INDIA Bloc : సీఈసీ జ్ఞానేష్ కుమార్‌కు వ్యతిరేకంగా రాహుల్ గాంధీ ఆధ్వర్యంలో ఇండియా బ్లాక్ కూటమి పార్టీలు సోమవారం సుప్రీంకోర్టులో పిటిషన్ దాఖలు చేశాయి. 11 ప్రతిపక్ష పార్టీలు దీనికి సంతకం చేయగా.. నాలుగు పార్టీలు దూరంగా ఉన్నాయి.

INDIA Bloc : కేంద్రానికి వ్యతిరేకంగా ప్రతిపక్షాలు జట్టుకట్టిన ఇండియా బ్లాక్ కూటమిలో విబేధాలు కొనసాగుతున్నాయి. సీఈసీ జ్ఞానేష్ కుమార్‌కు వ్యతిరేకంగా, అలాగే, ఎన్నికల సంఘంలో అవకతవకలపై రాహుల్ గాంధీ ఆధ్వర్యంలో ఇండియా బ్లాక్ కూటమి పార్టీలు సోమవారం సుప్రీంకోర్టులో పిటిషన్ దాఖలు చేశాయి. 11 ప్రతిపక్ష పార్టీలు దీనికి సంతకం చేయగా.. నాలుగు ప్రధాన పార్టీలు దూరంగా ఉన్నాయి.

ఇండియా కూటమిలో భాగస్వామిగా ఉన్న అరవింద్ కేజ్రీవాల్‌ ఆధ్వర్యంలోని ఆమ్ ఆద్మీ పార్టీ, ఎంకే స్టాలిన్ ఆధ్వర్యంలోని డీఎంకే ఈ పిటిషన్‌కు దూరంగా ఉన్నాయి. ఇండియా బ్లాక్‌లో లేకపోయినప్పటికీ.. ఎన్‌డీయే, బీజేపీకి ప్రత్యర్థి పార్టీలైన నవీన్ పట్నాయక్ ఆధ్వర్యంలోని బిజూ జనతా దళ్ (బీజేడీ), విజయ్ ఆధ్వర్యంలోని టీవీకే పార్టీ కూడా ఈ పిటిషన్‌కు దూరంగా ఉంది. ఈ పార్టీలన్నీ జ్ఞానేష్ కుమార్ రాజీనామాకు డిమాండ్ చేసినవే. కానీ, సుప్రీంకోర్టులో పిటిషన్ దాఖలు చేసే సమయంలో మాత్రం దూరంగా ఉన్నాయి.

అందులోనూ ఇండియా బ్లాక్ కూటమిలోనే ఉన్న డీఎంకే, ఆప్‌లు పిటిషన్‌కు దూరంగా ఉండటంతో ఈ కూటమిలో విబేధాలు ఇంకా కొనసాగుతున్నట్లు స్పష్టమవుతోంది. తమిళనాడులో కాంగ్రెస్ పార్టీకి, డీఎంకేకు మధ్య విబేధాలు కొనసాగుతున్న సంగతి తెలిసిందే. విజయ్ టీవీకే పార్టీకి మద్దతిచ్చిన కాంగ్రెస్.. ప్రభుత్వంలో భాగస్వామి కావడంతో డీఎంకే.. కాంగ్రెస్ పార్టీకి దూరంగా ఉంటోంది. అలాగే, ఆమ్ ఆద్మీ, కాంగ్రెస్ పార్టీ మధ్య కూడా పలు రాష్ట్రాల్లో విబేధాలున్నాయి. దీంతో ఆప్ కూడా ఇండియా బ్లాక్ సమావేశాలకు దూరంగా ఉంటోంది.

బీజేడీకి సంబంధించిన సర్ ప్రక్రియను ఆ పార్టీ అధినేత, మాజీ సీఎం నవీన్ పట్నాయక్ వ్యతిరేకిస్తున్నారు. జ్ఞానేష్ రాజీనామా చేయాలని డిమాండ్ చేస్తున్నారు. ఇటీవల ర్యాలీలో కూడా బీజేడీ ఎంపీలు పాల్గొన్నారు. కానీ, తాజా పిటిషన్‌కు మాత్రం దూరంగా ఉన్నారు.