వానపడితే రుతుపవనాలు వచ్చినట్టు కాదు

వర్షాలకు, నైరుతి రుతుపవనాలకు తేడా ఉందని, ఒక ప్రాంతంలో వర్షం కురిసినంత మాత్రాన రుతుపవనాలు వచ్చినట్టు కాదని పరిశోధకులు పేర్కొంటున్నారు.

• మాన్‌సూన్‌ అసలు ఆగమనాన్ని గుర్తించే పద్ధతిని కనుగొన్న పరిశోధకులు

న్యూఢిల్లీ : వర్షాలకు, నైరుతి రుతుపవనాలకు తేడా ఉందని, ఒక ప్రాంతంలో వర్షం కురిసినంత మాత్రాన రుతుపవనాలు వచ్చినట్టు కాదని పరిశోధకులు పేర్కొంటున్నారు. ఆయా ప్రాంతాల వాతావరణ పరిస్థితుల వల్ల కురిసే కొద్దిపాటి వానలకు, దేశవ్యాప్తంగా విస్తరించే రుతుపవన వ్యవస్థకు మధ్య తేడాను గుర్తించే ఒక కొత్త పద్ధతిని ఐఐటీ మద్రాస్‌, గౌహతి విశ్వవిద్యాలయ పరిశోధకులు అభివృద్ధి చేశారు. ముఖ్యంగా ప్రభుత్వాలు నీటినిల్వలు, ఆహార భద్రత, వరదల నిర్వహణకు ముందస్తు ప్రణాళికలు రూపొందించుకోవచ్చునని పరిశోధకులు చెబుతున్నారు. ఈ పరిశోధనకు సంబంధించిన వివరాలు మెటియోరలాజికల్‌ సొసైటీకి చెందిన ‘జర్నల్‌ ఆఫ్‌ ైక్లెమేట్‌’లో ప్రచురితమయ్యాయి. ఐఐటీ మద్రాస్‌కు చెందిన యోగరాజ్‌ పాటిల్‌, గౌరవ్‌ చోప్రా, శ్రుతి టాండన్‌, ఆర్‌ఐ సుజిత్‌, గౌహతి విశ్వవిద్యాలయానికి చెందిన బీఎన్‌ గోస్వామి ఈ పరిశోధనలో భాగస్వాములయ్యారు.

కొత్త పద్ధతి ఎలా పనిచేస్తుంది?

ఒక ప్రాంతంలో తొలిసారిగా వర్షం పడినంత మాత్రాన రుతుపవనాలు వచ్చాయా లేదా తెలుసుకోడానికకి  పరిశోధకులు ‘ైక్లెమేట్‌ నెట్‌వర్క్‌’ విధానాన్ని అభివృద్ధి చేశారు. దేశంలోని  వివిధ ప్రాంతాలను ఒక నెట్‌వర్క్‌లోని కేంద్రాలు (నోడ్స్‌)గా పరిగణిస్తారు. ఆయా ప్రాంతాల్లో వర్షపాతం ప్రారంభమయ్యే సమయాల మధ్య సంబంధాలను గుర్తించి వాటిని అనుసంధానిస్తారు. 84 ఏండ్ల వర్షపాత గణాంకాలను విశ్లేషించిన పరిశోధకులు ఈశాన్య భారతదేశంలో సాధారణంగా మే 15 ప్రాంతంలో, భారత ద్వీపకల్ప ప్రాంతంలో జూన్‌ 9 ప్రాంతంలో విస్తృత స్థాయి రుతుపవనాల ఆగమనం జరుగుతున్నట్టు గుర్తించారు. కేరళ ప్రాంతంలో తొలుత స్థానిక వర్షాల కారణంగా చిన్న సమూహం ఏర్పడుతుంది. రుతుపవన ఆగమనాన్ని గుర్తించేందుకు ఈ కొత్త విధానం ప్రత్యామ్నాయం కాదని, వాటికి అదనపు సహాయకంగా ఉపయోగపడుతుందని గౌహతి విశ్వవిద్యాలయానికి చెందిన ప్రొఫెసర్‌ బీఎన్‌ స్వామి చెప్పారు.

రైతులు, ప్రభుత్వాలకు ప్రయోజనం

ఈ విధానం స్థానికంగా కురిసే తాత్కాలిక వర్షాలను రుతుపవనాల ఆగమనంగా పొరపడే అవకాశాలు తగ్గుతాయని ఐఐటీ మద్రాస్‌ ప్రొఫెసర్‌ ఆర్‌ఐ సుజిత్‌ తెలిపారు. విత్తనాలు వేసేందుకు, ప్రభుత్వాలు నీటి వనరుల నిర్వహణ, వరదల ముప్పును ఎదుర్కొనేందుకు ఇది ఉపయోగపడుతుందని చెప్పారు.