HPV Vaccine | హెచ్‌పీవీ టీకాతో క్యాన్సర్‌కు అడ్డుకట్ట!.. పురుషుల్లో సగానికి తగ్గనున్న ముప్పు

సర్వైకల్‌(గర్భాశయ/గొంతు) క్యాన్సర్‌ను తగ్గించే హెచ్‌పీవీ టీకా పురుషుల్లో గణనీయమైన ప్రభావాన్ని చూపుతుందని తాజా అధ్యయనం వెల్లడించింది.

న్యూఢిల్లీ: సర్వైకల్‌(గర్భాశయ/గొంతు) క్యాన్సర్‌ను తగ్గించే హెచ్‌పీవీ టీకా పురుషుల్లో గణనీయమైన ప్రభావాన్ని చూపుతుందని తాజా అధ్యయనం వెల్లడించింది. జామా అంకాలజీ జర్నల్‌లో ప్రచురితమైన వివరాల ప్రకారం.. లైంగిక చర్యల వల్ల చర్మం ద్వారా ఒకరి నుంచి ఒకరికి హెచ్‌పీ వైరస్‌ వ్యాపిస్తుంది.

ఈ వైరస్‌ మలద్వార క్యాన్సర్‌, గొంతు క్యాన్సర్‌, పురుషాంగ క్యాన్సర్లకు కారణమవుతున్నది. ఈ వైరస్‌తో పాటు సర్వైకల్‌ క్యాన్సర్‌ను తగ్గించడానికి హెచ్‌పీవీ టీకా ఉపయోగపడుతుంది. గ్లోబల్‌ డాటాబేస్‌ ఆధారంగా చేసిన అధ్యయనం ప్రకారం తొమ్మిది రకాల హెచ్‌పీ వైరస్‌లు రాకుండా టీకాలు తీసుకున్న 6.15 లక్షల మంది 9-26 ఏండ్ల లోపు పురుషుల డాటాను 20 లక్షలకు పైగా హెచ్‌పీ టీకా తీసుకోని పురుషులతో పోల్చి చూశారు.

టీకా తీసుకొన్న వారిలో అన్ని రకాల క్యాన్సర్లు వచ్చే ప్రమాదం 46 శాతానికి తగ్గింది. ఇందులోనూ 9-14 ఏండ్ల లోపు వ్యాక్సిన్‌ పొందిన వారిలో క్యాన్సర్లు వచ్చే ప్రమాదం 42 శాతానికి తగ్గింది. 9 సంవత్సరాల్లోపు పిల్లల్లో రోగ నిరోధక ప్రతిస్పందన చాలా బలంగా ఉంటుంది.