బెంగుళూరు: కర్నాటక(Karnataka)లో ఓ వ్యక్తి.. ముస్లిం మహిళలు ధరించే బుర్కాను వేసుకున్నాడు. బుర్కాతో ఉన్న ఆ వ్యక్తిని ధార్వాడ్ జిల్లాలో గుర్తించారు. బస్సులో ప్రయాణిస్తున్న అతన్ని పట్టుకున్నారు. కర్నాటకలో ప్రస్తుతం శక్తి యోజన కింద మహిళలకు ఉచిత బస్సు ప్రయాణ సౌకర్యం కల్పిస్తున్నారు. అయితే బస్సులో ఫ్రీగా ట్రావెల్ చేయాలన్న ఉద్దేశంతో ఆ వ్యక్తి బుర్కా ధరించి మహిళా అవతారమెత్తినట్లు తెలుస్తోంది. బుర్కా ధరించిన వ్యక్తిని వీరభద్రయ్యగా గుర్తించారు.
బస్సు స్టాప్లో ఒంటరిగా ఉన్న అతనిపై అనుమానం రావడంతో స్థానికులు అతన్ని నిలదీశారు. యాచన కోసమే బుర్కా ధరించినట్లు అతను చెప్పాడు. కానీ అతను ఇచ్చిన వివరణతో అక్కడున్నవాళ్లు సంతృప్తి పడలేదు. శక్తి యోజన కింద ఉచిత బస్సు ప్రయాణం కోసం అతను బుర్కా వేసుకున్నట్లు నిర్ధారణకు వచ్చారు. అతని వద్ద ఓ మహిళకు చెందిన ఆధార్ కార్డు కూడా ఉంది.
ఇటీవల జరిగిన అసెంబ్లీ ఎన్నికల్లో కాంగ్రెస్ పార్టీ పలు వాగ్దాలు చేసింది. మహిళలకు ఉచిత బస్సు ప్రయాణం కల్పించనున్నట్లు ఆ పార్టీ తమ ఎజెండాలో పేర్కొన్నది. దానిలో భాగంగానే శక్తి యోజన కింద ఆడవాళ్లకు ఫ్రీ బస్సు ప్రయాణం కల్పిస్తున్నారు.