Bhupendra Patel | తొలిసారి ఎమ్మెల్యే.. అప్పుడే సీఎం కుర్చీ.. ఎవ‌రీ భూపేంద్ర ప‌టేల్‌?

గుజ‌రాత్ ముఖ్య‌మంత్రిగా భూపేంద్ర ప‌టేల్ ( Bhupendra Patel ) పేరును ప్ర‌క‌టించింది బీజేపీ. విజ‌య్ రూపానీ రాజీనామానే ఆశ్చ‌ర్యానికి గురి చేయ‌గా.. కొత్త సీఎంగా భూపేంద్ర‌ను ప్ర‌క‌టించ‌డం మ‌రింత ఆశ్చ‌ర్య‌ప‌రిచింది.

అహ్మ‌దాబాద్‌: గుజ‌రాత్ ముఖ్య‌మంత్రిగా భూపేంద్ర ప‌టేల్ ( Bhupendra Patel ) పేరును ప్ర‌క‌టించింది బీజేపీ. విజ‌య్ రూపానీ రాజీనామానే ఆశ్చ‌ర్యానికి గురి చేయ‌గా.. కొత్త సీఎంగా భూపేంద్ర‌ను ప్ర‌క‌టించ‌డం మ‌రింత ఆశ్చ‌ర్య‌ప‌రిచింది. సోమ‌వార‌మే ఆయ‌న ప్ర‌మాణ స్వీకారం చేయ‌నున్నారు. ఈ నేప‌థ్యంలో అస‌లు ఎవ‌రీ భూపేంద్ర ప‌టేల్ అన్న‌ది ఒక‌సారి చూద్దాం.

• భూపేంద్ర ప‌టేల్ తొలిసారి 2017లోనే ఎమ్మెల్యేగా ఎన్నిక‌య్యారు. ఘ‌ట్లోడియా ఈయ‌న నియోజ‌క‌వ‌ర్గం. కాంగ్రెస్ అభ్య‌ర్థి శ‌శికాంత్ ప‌టేల్‌పై ల‌క్ష ఓట్ల‌కుపైగా మెజార్టీతో ఈయ‌న గెలిచారు. మాజీ సీఎం, ప్ర‌స్తుత యూపీ గ‌వ‌ర్న‌ర్ ఆనందిబెన్ ప‌టేల్‌కు విశ్వాస‌పాత్రుడని భూపేంద్ర‌కు పేరుంది.
• గ‌తంలో అహ్మ‌దాబాద్ అర్బ‌న్ డెవ‌ల‌ప్‌మెంట్ అథారిటీకి చైర్మ‌న్‌గా ప‌ని చేశారు. అందావ‌ద్ మున్సిప‌ల్ కార్పొరేష‌న్ స్టాండింగ్ క‌మిటీకి కూడా నేతృత్వం వ‌హించారు.
• అహ్మ‌దాబాద్ ప్ర‌భుత్వ పాలిటెక్నిక్ నుంచి సివిల్ ఇంజినీరింగ్ డిప్లొమా పొందారు. 2017 ఎన్నిక‌ల్లో త‌న‌కు రూ.5 కోట్ల ఆస్తులు ఉన్న‌ట్లు ప్ర‌క‌టించారు.
• గుజ‌రాత్‌లో బ‌ల‌మైన ప‌టీదార్ సామాజిక‌వ‌ర్గానికి చెందిన వ్య‌క్తి. వ‌చ్చే ఎన్నిక‌ల్లో ఈ క‌మ్యూనిటీ ఓట్లే ల‌క్ష్యంగా బీజేపీ ఇప్పుడు భూపేంద్ర ప‌టేల్‌ను ముఖ్య‌మంత్రిని చేసింది.
• నిజానికి ముఖ్య‌మంత్రి రేసులో భూపేంద్ర పేరు లేనే లేదు. కానీ చివ‌రి నిమిషంలో అనూహ్యంగా ఆయ‌న పేరు ప్ర‌క‌టించింది బీజేపీ.