Hemant Soren | జార్ఖండ్ సీఎంగా హేమంత్ సోరెన్ భార్య‌..? బీజేపీ ఎంపీ కీల‌క వ్యాఖ్య‌లు

Hemant Soren | జార్ఖండ్ ముఖ్య‌మంత్రి హేమంత్ సోరెన్ త‌న ప‌ద‌వికి రాజీనామా చేయ‌నున్న‌ట్లు బీజేపీ ఎంపీ నిశికాంత్ దూబే కీల‌క వ్యాఖ్య‌లు చేశారు. సీఎం ప‌ద‌వికి రాజీనామా చేసి, ఆ బాధ్య‌త‌ల‌ను భార్య క‌ల్ప‌న‌కు అప్ప‌జెప్పే అవ‌కాశం ఉంద‌న్నారు.

Hemant Soren | రాంచీ : జార్ఖండ్ ముఖ్య‌మంత్రి హేమంత్ సోరెన్ త‌న ప‌ద‌వికి రాజీనామా చేయ‌నున్న‌ట్లు బీజేపీ ఎంపీ నిశికాంత్ దూబే కీల‌క వ్యాఖ్య‌లు చేశారు. సీఎం ప‌ద‌వికి రాజీనామా చేసి, ఆ బాధ్య‌త‌ల‌ను భార్య క‌ల్ప‌న‌కు అప్ప‌జెప్పే అవ‌కాశం ఉంద‌న్నారు. జార్ఖండ్ ముక్తి మోర్చా ఎమ్మెల్యే స‌ర్ఫ‌రాజ్ అహ్మ‌ద్ నిన్న త‌న ఎమ్మెల్యే ప‌ద‌వికి రాజీనామా చేసిన సంగ‌తి తెలిసిందే. వెంట‌నే ఎమ్మెల్యే రాజీనామాను స్పీక‌ర్ ఆమోదించారు. ఈ నేప‌థ్యంలో దూబే వ్యాఖ్య‌ల‌కు ప్రాధాన్య‌త ఏర్ప‌డింది. స‌ర్ఫ‌రాజ్ త‌ర‌హాలోనే హేమంత్ సోరెన్ కూడా సీఎం ప‌ద‌వికి రాజీనామా చేస్తార‌ని వార్త‌లు వినిపిస్తున్నాయి.

హేమంత్ సోరెన్‌పై ఈడీ ఇప్ప‌టికే మ‌నీలాండ‌రింగ్ కేసు న‌మోదు చేసింది. ఈ కేసులో ప‌లుమార్లు ఈడీ నోటీసులు జారీ చేసింది. ఈ నేప‌థ్యంలో సోరెన్‌ను ఈడీ ఏ క్ష‌ణ‌మైనా అరెస్టు చేసే అవ‌కాశం ఉంది. ఈ నేప‌థ్యంలో ముందుగానే సీఎం ప‌ద‌వి నుంచి త‌ప్పుకొని, భార్య క‌ల్ప‌న‌కు ఆ బాధ్య‌త‌లు క‌ట్ట‌బెట్టే అవ‌కాశం ఉన్న‌ట్లు తెలుస్తోంది.

అయితే జార్ఖండ్ అసెంబ్లీ ప‌ద‌వీ కాలం ఈ ఏడాది చివ‌ర్లో ముగియ‌నుంది. అంటే ఎన్నిక‌లు ఆరేడు నెల‌ల్లో జ‌రిగే అవ‌కాశం ఉంది. ఈ ప‌రిస్థితుల్లో స‌ర్ఫ‌రాజ్ రాజీనామా చేసిన స్థానానికి ఉప ఎన్నిక జ‌రిగే అవ‌కాశం లేదు. సోరెన్ రాజీనామా చేస్తే ఆ స్థానానికి ఉప ఎన్నిక నిర్వ‌హిస్తారా..? అనే విష‌యంపై సందిగ్ధ‌త నెల‌కొంది. ఈ విష‌యంలో జార్ఖండ్ గ‌వ‌ర్న‌ర్ న్యాయ స‌ల‌హా తీసుకునే అవ‌స‌రం ఉంద‌ని దూబే తెలిపారు. జార్ఖండ్ అసెంబ్లీ చివ‌రిసారిగా 2019, డిసెంబ‌ర్ 27న ఏర్పాటైంది.