Visit:
Bengaluru | కర్ణాటక బెంగళూరులో ఓ అరుదైన ఘటన వెలుగు చూసింది. ఎనిమిది సంవత్సరాల బాలిక కడుపులో క్రికెట్‌ బాల్‌ సైజులో ఉన్న హెయిర్‌ బాల్‌ను ఆపరేషన్‌ చేసి తొలగించారు. బాధిత బాలిక ట్రైకోఫాగియా అనే అరుదైన వ్యాధితో ఇబ్బందిపడుతున్నట్లు వైద్యులు పేర్కొన్నారు. ఈ వ్యాధి ఉన్న వారికి జుట్టు తినే అలవాటు ఉంటుందని.. దాన్ని రాంపుజెల్‌ సిండ్రోమ్‌గా పిలుస్తారని పేర్కొన్నారు. బాధితురాలికి గత రెండేళ్లుగా ఆకలి లేకపోవడం, తరుచు వాంతులు చేసుకుంటూ వస్తుంది. దాంతో తల్లిదండ్రులకు ఆందోళనకు గురై.. ఆమెను పిడియాట్రిషన్, ఈఎన్‌టీ తదితర స్పెషలిస్ట్‌ వైద్యులకు చూపించింది. అయినా, ఎలాంటి ఫలితం కనిపించలేదు. పలు ఆసుపత్రుల్లో చూపించినా బాలిక ఆరోగ్య పరిస్థితి బాగానే ఉందని తెలిపారు. అయితే, ఏదైనా గ్యాస్ట్రిక్‌ సమస్య ఉండొచ్చని భావించారు. ఈ క్రమంలో బెంగళూరులో ఉన్న ఆస్టర్స్‌ పిల్లల, మహిళల ఆసుపత్రికి వెళ్లారు. దీంతో పరీక్షలు చేసిన వైద్యులు బాలిక ట్రైకోబెజోర్ ఉన్నట్లు గుర్తించారు.
బాలిక జీర్ణాశయాంతర పేగుల్లో భారీగా జుట్టుకు పేరుకుపోయింది. ఆ తర్వాత ఓపెన్‌ స్టమక్‌ ఆపరేషన్‌ చేసి క్రికెట్‌ బాల్‌ సైజులో ఉన్న హెయిర్‌ బాల్‌ను తొలగించారు. ట్రైకోబెజోర్ అనేది చాలా అరుదైన పరిస్థితి అని.. సదరు బాలిక తరహాలోనే చిన్నపిల్లల్లో కనిపిస్తుందని వైద్యులు తెలిపారు. ట్రైకోఫాగియాతో సంబంధం ఉంటుందని.. ఇది జట్టును తినే మానసిక రుగ్మత అని పేర్కొన్నారు. సాధారణంగా కౌమారదశలో ఉన్న బాలికల్లో కనిపిస్తుందని పీడియాట్రిక్‌ సర్జన్‌ డాక్టర్‌ మంజరి సోమశేఖర్‌ తెలిపారు. హెయిర్‌ బాల్‌ పెద్దగా, జిగటగా ఉన్నందున ఎండోస్కోపిక్‌ చేసేందుకు పరిస్థితి చాలా క్లిష్టంగా ఉన్నందున లాపరోటమీగా పిలిచే ఓపెన్‌ స్టమక్‌ సర్జరీని బాలికకు చేసినట్లు తెలిపారు. మొత్తం రెండున్నర గంటల్లో సర్జరీని విజయవంతంగా నిర్వహించినట్లు తెలిపారు. బాలికకు సర్జరీ చేయకపోతే తీవ్రమైన పోషకాహార లోపం, రక్తహీనత, కడుపు నుంచి గణనీయమైన రక్తస్రావానికి దారి తీసే అవకాశం ఉండేదన్నారు. ఆపరేషన్‌ అనంతరం ప్రత్యేకంగా ఆహారంతో పాటు కౌన్సెలింగ్‌ సైతం ఇస్తున్నట్లు వైద్యులు వివరించారు.
