Visit:
బెంగళూరు: ఏ ప్రభుత్వమైనా ఏదైనా సమస్య ఎదురైనప్పుడు, లేదా ఆరోపణలకు గురైనప్పుడు దానిని ఏదోఒక విధంగా పరిష్కరించాలని చూస్తుంది. అందుకోసం శతవిధాలా ప్రయత్నిస్తుంది. అయితే కర్ణాటక ప్రభుత్వ తీరు ఇందుకు భిన్నంగా ఉంది. వివరాల్లోకి వెళితే కర్ణాటక పబ్లిక్ సర్వీస్ కమిషన్(కేపీఎస్సీ)లో ప్రభుత్వ ఉద్యోగాల నియామకాలకు సంబంధించి అవకతవకలు చోటుచేసుకున్నాయన్న ఆరోపణల నేపథ్యంలో కమిషన్ను మూసివేసే అంశాన్ని పరిశీలిస్తున్నట్లు ఆ రాష్ట్ర ముఖ్యమంత్రి డీకే శివకుమార్ ప్రకటించారు.
ఈ విషయమై న్యాయ, ఇతర నిపుణులతో చర్చిస్తున్నట్లు పేర్కొన్నారు. కేపీఎస్సీలో అక్రమాల ఆరోపణలు పెరుగుతున్నాయని అన్నారు. కమిషన్లో బాధ్యతలు చేపట్టిన కొందరు వ్యక్తులు అక్రమాలకు పాల్పడుతున్నారని ఆరోపించారు. కేపీఎస్సీ నియామకాల్లో అవకతవకలపై ప్రత్యేక దర్యాప్తు బృందం(సిట్) ఏర్పాటు చేయాలని కర్ణాటక హైకోర్టు ఆదేశించడాన్ని శివకుమార్ స్వాగతించారు.
