భర్తకు విడాకులివ్వకుండా వేరొకరితో సహజీవనం చెల్లదు

భర్తకు విడాకులివ్వకుండా, వేరొకరితో సహజీవనం చేసేవారికి మద్దతుగా ఆదేశాలు జారీ చేయలేమని అలహాబాద్‌ హైకోర్టు ఇటీవల తెలిపింది. చట్టవిరుద్ధ బాంధవ్యాలకు రక్షణ కల్పిస్తే, సమాజంలో అరాచకం ప్రబలుతుందని చెప్పింది.

• అలహాబాద్‌ హైకోర్టు తీర్పు

అలహాబాద్‌: భర్తకు విడాకులివ్వకుండా, వేరొకరితో సహజీవనం చేసేవారికి మద్దతుగా ఆదేశాలు జారీ చేయలేమని అలహాబాద్‌ హైకోర్టు ఇటీవల తెలిపింది. చట్టవిరుద్ధ బాంధవ్యాలకు రక్షణ కల్పిస్తే, సమాజంలో అరాచకం ప్రబలుతుందని చెప్పింది. సహజీవనం చేస్తున్న జంట రక్షణ కోసం దాఖలు చేసిన పిటిషన్‌ను తోసిపుచ్చింది. ఈ జంటలో మహిళకు 13 ఏళ్ల వయసులో ఓ వ్యక్తితో వివాహం జరిగింది.

ఆయనకు విడాకులివ్వకుండానే వేరొకరితో ఆమె సహజీవనం చేస్తున్నది. తమకు రక్షణ కల్పించాలని వీరిద్దరూ హైకోర్టును ఆశ్రయించారు. ధర్మాసనం స్పందిస్తూ, మహిళకు మెజారిటీ వయసు వచ్చిన తర్వాత అయినా తన భర్త నుంచి విడాకులు మంజూరు చేయాలని లేదా తమ వివాహాన్ని రద్దు చేయాలని కోర్టును కోరలేదని గుర్తు చేసింది. వీరిద్దరికీ రక్షణ కల్పిస్తూ ఆదేశాలిస్తే, వీరి చట్ట వ్యతిరేక సంబంధాన్ని కోర్టు చట్టబద్ధం చేసినట్లవుతుందని ఆందోళన వ్యక్తం చేసింది.