మొహాలీ: చండీగఢ్ యూనివర్సిటీ హాస్టల్ నుంచి అభ్యంతరకర వీడియోల లీక్ ఘటనపై స్థానిక ఎంపీ కిరెన్ ఖేర్ స్పందించారు. చండీగఢ్ యూనివర్సిటీలో జరిగిన పాశవిక ఘటన తనను కదిలించిందని ట్విట్టర్లో పేర్కొన్నారు. ఈ యూనివర్సిటీ కారణంగా చండీగఢ్ నగరం పేరుకు కళంకం ఏర్పడుతున్నదని ఆమె విమర్శించారు.
అయితే, చండీగఢ్ యూనివర్సిటీ తాను ప్రాతినిధ్యం వహిస్తున్న చండీగఢ్ లోక్సభ స్థానం పరిధిలో లేదని, అది పంజాబ్లోని ఖరార్లో ఉన్నదని ఖేర్ స్పష్టం చేశారు. ఘటనపై భగవంత్ మాన్ నేతృత్వంలోని పంజాబ్ ప్రభుత్వం సత్వర చర్యలు తీసుకోవాలని ఆమె డిమాండ్ చేశారు. ఈ ఘటనలో బాధితులైన యువతులు, వారి తల్లిదండ్రులకు ఖేర్ తన సానుభూతి తెలియజేశారు.
చండీగఢ్ యూనివర్సిటీ గర్ల్స్ హాస్టల్లో అమ్మాయిలు స్నానం చేస్తున్న వీడియోలు ఇటీవల లీకయ్యాయి. ఓ అమ్మాయి ఈ వీడియోలను తన బాయ్ఫ్రెండ్కు పంపగా, అతను వాటిని సోషల్ మీడియాలో అప్లోడ్ చేశాడు. ఈ ఘటన దేశవ్యాప్తంగా కలకలం రేపింది. ఘటనపై దర్యాప్తు చేపట్టిన పోలీసులు ముగ్గురు నిందితులను అరెస్ట్ చేశారు. కాగా, నిందితురాలైన అమ్మాయి తన సొంత వీడియోలను మాత్రమే బాయ్ఫ్రెండ్కు పంపిందని పోలీసులు వెల్లడించారు.