Delhi Schools: ఢిల్లీలో 50 స్కూళ్ల‌కు బాంబు బెదిరింపులు.. ద‌ర్యాప్తు చేప‌ట్టిన పోలీసులు

Delhi Schools : ఢిల్లీలో ఇవాళ సుమారు 50 స్కూళ్ల‌కు మెయిల్ బెదిరింపు చేశారు. టెర్ర‌రైజ‌ర్స్ 111 అనే గ్రూపు వివిధ స్కూళ్ల‌కు మెయిల్ చేసిన‌ట్లు తెలుస్తోంది. 25 వేల డాలర్లు ఇవ్వాలంటూ ఆ బెదిరింపు మెయిల్‌లో పేర్కొన్నారు.

న్యూఢిల్లీ: ఢిల్లీలో మ‌ళ్లీ స్కూళ్ల‌(Delhi Schools)కు బెదిరింపులు వ‌చ్చాయి. ఇవాళ సుమారు 50 స్కూళ్ల‌కు మెయిల్ బెదిరింపు చేశారు. పోలీసులు దీన్ని ద్రువీక‌రించారు. టెర్ర‌రైజ‌ర్స్ 111 అనే గ్రూపు వివిధ స్కూళ్ల‌కు మెయిల్ చేసిన‌ట్లు తెలుస్తోంది. డీఏవీ ప‌బ్లిక్ స్కూల్‌, ఫెయిత్ అకాడ‌మీ, డూన్ ప‌బ్లిక్ స్కూల్‌, స‌ర్వోద‌య విద్యాల‌య‌తో పాటు ఇత‌ర స్కూళ్ల బెదిరింపులు వ‌చ్చాయి. 25 వేల డాలర్లు ఇవ్వాలంటూ ఆ బెదిరింపు మెయిల్‌లో పేర్కొన్నారు.

క్రిప్టోక‌రెన్సీ రూపంలో 5వేల డాల‌ర్లు ఇవ్వాలంటూ అదే గ్రూపు ఆగ‌స్టు 18వ తేదీన బాంబు బెదిరింపుల‌కు పాల్ప‌డింది. ప్రిన్సిపాల్స్‌, అడ్మినిస్ట్రేట‌ర్స్‌కు బెదిరింపు గ్యాంగ్ బ‌ల్క్ మెయిల్ పంపింది. ఐటీ సిస్ట‌మ్స్‌ను ఉల్లంఘించిన‌ట్లు తెలిపారు. స్కూల్ ఆవ‌ర‌ణ‌ల్లో 48 గంట‌ల్లోగా బాంబులు పేల్చుతామ‌ని మెయిల్‌లో పేర్కొన్నారు. మేం టెర్ర‌రైజ‌ర్స్ 111 గ్రూపుకు చెందిన‌వాళ్ల‌మ‌ని, మీ బిల్డింగ్‌లో పేలుడు ప‌దార్ధాలు అమ‌ర్చామ‌ని, క్లాస్‌రూమ్‌లూ.. ఆడిటోరియంలు, స్టాఫ్ రూమ్‌లు, స్కూల్ బ‌స్సులను శ‌క్తివంత‌మైన సీ4 బాంబుల‌తో పేల్చివేస్తామ‌ని బెదిరింపు మెయిల్‌లో పేర్కొన్నారు.