Naga Civilians Shot Dead | మణిపూర్‌లో ఇద్దరు నాగా పౌరుల కాల్చివేత.. మూడు రోజుల్లో రెండో ఘటన

Naga Civilians Shot Dead | మణిపూర్‌లో హింసాత్మక సంఘటనలు కొనసాగుతున్నాయి. తాజాగా ఇద్దరు నాగా పౌరులను సాయుధ వ్యక్తులు కాల్చి చంపారు. ఈ కాల్పుల్లో మరో ఇద్దరు నాగా పౌరులు గాయపడ్డారు. భద్రతా దళాలు సంఘటనా ప్రాంతానికి చేరుకుని పరిస్థితిని సమీక్షించాయి.

ఇంఫాల్‌: మణిపూర్‌లో హింసాత్మక సంఘటనలు కొనసాగుతున్నాయి. తాజాగా ఇద్దరు నాగా పౌరులను సాయుధ వ్యక్తులు కాల్చి చంపారు. ఈ కాల్పుల్లో మరో ఇద్దరు నాగా పౌరులు గాయపడ్డారు. భద్రతా దళాలు సంఘటనా ప్రాంతానికి చేరుకుని పరిస్థితిని సమీక్షించాయి. (Naga Civilians Shot Dead) సేనాపతి జిల్లాలోని కాలెన్‌జాంగ్ గ్రామంలో ఈ సంఘటన జరిగింది. శనివారం మధ్యాహ్నం గ్రామ పెద్దకు చెందిన ఇంట్లో ఉన్న నాగా పౌరులపై గుర్తు తెలియని సాయుధ వ్యక్తులు కాల్పులు జరిపారు. ఈ కాల్పుల్లో ఇద్దరు నాగా పౌరులు మరణించగా మరో ఇద్దరు గాయపడ్డారు. మృతులను ఆ జిల్లాలోని వేర్వేరు గ్రామాలకు చెందిన రాకీ, కుమార్‌గా గుర్తించారు. కుకీ తెగకు చెందిన వ్యక్తులు ఈ కాల్పులకు పాల్పడినట్లు స్థానికులు ఆరోపించారు.

కాగా, ఈ కాల్పుల సంఘటన గురించి తెలిసిన వెంటనే పోలీసులు ఆ ప్రాంతానికి చేరుకున్నారు. అక్కడి పరిస్థితిని సమీక్షించారు. భారత్-మయన్మార్ సరిహద్దు సమీపంలోని కామ్‌జోంగ్ జిల్లాలో జరిగిన సాయుధ దాడిలో నలుగురు నాగా పౌరులు మరణించిన రెండు రోజుల తర్వాత తాజాగా ఈ హత్యలు జరిగాయి. ఈ నేపథ్యంలో నాగా ప్రజల భద్రతపై ఆ తెగల సంస్థలు ఆందోళన వ్యక్తం చేశాయి. మణిపూర్ ముఖ్యమంత్రి యుమ్నామ్ ఖేమ్‌చంద్ సింగ్ ఈ ఘటనను ఖండించారు. నిరపరాధుల ప్రాణాలపై జరిగిన పిరికిపంద చర్యగా ఆయన అభివర్ణించారు.