పద్యం మోస్తున్నంత సేపు
నాకు అలసట తెలియలే
యుద్ధం చేస్తున్నంత కాలం
నన్ను ఓటమి వెంటాడలే!
దుఃఖమెప్పుడు రూప వస్తువు కాదు
అపురూపమయింది
ధైర్యంగా నిలబడే వాడిని
నిఖార్సుగా నిగ్గు తేలుస్తుంది!
ప్రవహించే నదిని చూస్తే
ఎవరికైనా భయమే
తెగించి ఎదురీదితేనే
ప్రమాదాలను జయించేది!
సముద్రం ఎంత ఎగిసిపడినా
అది ఆకాశాన్ని అందుకోలేదు
అల్పులెందరు వేలెత్తి చూపినా
ధీశాలి కీర్తి కిరీటం నేల జారదు!
చరిత్రలో ఎవరినైనా చూడండి
నిజాయితే వెన్నెముక
పద్యమైనా సరే బజారుకెక్కందే
దాని బలం నిరూపితం కాదు!
రెండు పాదాల మీద
సాగుతున్న నీ జీవితం
ఎంత క్లుప్తమో అర్థమైతే
నీకు కవిత్వమబ్బినట్లే!!
-కోట్ల వెంకటేశ్వరరెడ్డి
94402 33261