బాలోత్సవం

నిండుగ నవ్వెడి బాలలు దండిగ తమ సొంతమైన తరుణమెఱుగుచున్‌ పండిత జవహరు నెహ్రూ గుండెను పూచిన గులాబి గొప్పగ మురిసెన్‌.

నిండుగ నవ్వెడి బాలలు
దండిగ తమ సొంతమైన తరుణమెఱుగుచున్‌
పండిత జవహరు నెహ్రూ
గుండెను పూచిన గులాబి గొప్పగ మురిసెన్‌.

మకిలి వస్త్రములైన చకితమెరుగనట్టి
పరమార్థరూప సౌభాగ్యమొగము
చెడుగుడులాడుచు చిట్టిబొజ్జకు బువ్వ
బెట్టగను మరచు దిట్టతనము
పలుకులందు తేనెలొలుకగ వాదించు
పారలౌకికతత్వ భవ్యమనము
అరమరికలు లేక సరదాగ తిరిగెడు
అనురాగ బంధాల ఆత్మగుణము
కోరుకున్న రీతి ఊరేగు భోగంబు
పూర్వజన్మ సుకృత పుణ్యఫలము
చీకుచింత లేని చిననాటి యోగంబు
మరపురాని మధుర చరిత యుగము.

కరుణ ప్రేమల యందును తరుగుబోని
ఆత్మవిశ్వాస బలమును అందజేసి
శాంతిమయ గుణ సౌశీల్య కాంతితోడ
రోగపీడితుల మదినారోగ్యపరచు.
కల్లాకపటం తెలియని
పిల్లలు ఇలువేల్పులేను ప్రియమున గనగన్‌
చల్లని వెన్నెల సొనలు
మల్లెల సొబగుల చిలికెడు మాహాత్మ్యసిరుల్‌.

– రాకుమార 95501 84758