నీళ్ల జెండా…!

అతడు దివ్యాంగుడైనా నీళ్ల సమస్యపై విప్లవించాడు

అతడు దివ్యాంగుడైనా
నీళ్ల సమస్యపై విప్లవించాడు
కదలలేక పోయినా
నల్లగొండను కదిలించాడు
నీళ్ల గోసను ఢిల్లీకి వినిపించాడు
అతడు
జలసాధన సమితి పతాకం
ప్లోరోసిస్‌ నిర్మూలనకు ల్యాండ్‌ మార్క్‌
రేపటి ఉద్యమాలకు మార్గదర్శి
మనుషులు
కండ్లముందు కప్పల్లా డోకుతుంటే
పొరలు కమ్మిన వలస పాలకుల కండ్లు
పదవులనే పరమావధిగా కప్పుకున్నారు
ప్లొరోసిస్‌ ఎవరికీ ఎజెండా కాలే
నేలనేలంతా
దశాబ్దాలుగా కరువుతో అల్లాడింది
చారెడు నీళ్లకోసం కొంగువట్టి ఆర్థించింది
ఏ గంగమ్మ కంట్లో కన్నీరు రాల్చలే
ఏ నదికి దూపతీర్చే కనికరం లేదు
అతనికి
మానవ జన్మ శాపగ్రస్థమైనా
బాధపడలే మడత చుట్టుకొని కూసోలే
నేలకు నీళ్లు తాపే ఉద్యమమై
దుశ్చర్ల సత్యనారాయణ వెంట
నీళ్ల జెండై నడిచిండు
నల్లగొండ నీళ్లలో
అతని కన్నీటి చక్కలున్నయి
తీరొక్క పంటల్లో అతని నవ్వుంటది
అంశల స్వామి కాదు నీళ్లస్వామి
జలసాధన స్వామి!
(నల్లగొండ అంశల స్వామికి నివాళి)

వనపట్ల సుబ్బయ్య
94927 65358