స్మార్ట్ ఫోన్ యూజర్లకు ఎప్పటికప్పుడు కొత్త ఫీచర్స్ అందుబాటులోకి తెస్తున్న గూగుల్ మరో కొత్త ఆప్షన్ను తీసుకొస్తున్నది. ‘ఫైండ్ మై డివైజ్’ వెర్షన్ను త్వరలోనే అప్డేట్ చేయనుంది. ఇప్పటి వరకు ఇది ‘బయోమెట్రిక్ అన్లాక్’ ఫంక్షనింగ్ దశలో ఉన్నది. అంటే గూగుల్ పాస్వర్డ్తో దీన్ని ఓపెన్ చేయొచ్చు. ఈ పాస్వర్డ్ కాస్తా ఫ్రాడ్స్టర్ల చేతికి చిక్కితే.. మీ ఫోన్ ఎక్కడుందో కనిపెట్టి మరీ తస్కరించే ప్రమాదమూ లేకపోలేదు.
దీనికి రిమోట్ లాక్ ఫీచర్ అందుబాటులోకి రానుంది. ఫింగర్ ప్రింట్, ఫేస్ రికగ్నైజేషన్ ద్వారా మాత్రమే దీనిని ఓపెన్ చేయగలం. గూగుల్ పాస్వర్డ్ చేజిక్కించుకొని ఇతరులు ఎవరూ మన ఫోన్ ఎక్కడుందో కనిపెట్టలేరన్నమాట! దీంతో డివైజ్ సహా అందులోని డాటా కూడా సేఫ్గానే ఉంటుంది. ఆండ్రాయిడ్ 10, అంతకంటే ఎక్కువ ఆపరేటింగ్ సిస్టమ్లో నడుస్తున్న ఆండ్రాయిడ్ ఫోన్ల కోసం ఈ ఫీచర్ను తీసుకురానున్నారు. అయితే ఈ సరికొత్త ఫీచర్ను పొందాలంటే మాత్రం ఈ ఏడాది చివరిదాకా ఆగాల్సిందేనట.