కెమెరా యోధురాలు

ఎన్నో సవాళ్లు ఎదురయ్యాయి. అయినా నిరాశ చెందలేదు. కన్నీళ్లు దిగమింగుకుంటూ, సుడిగుండాలు దాటుకుంటూ కొత్త జీవితాన్ని ప్రారంభించింది. ఉన్నత విద్యాభ్యాసం చేసింది. తన కాళ్లపై తాను నిలబడింది. కొడుకును చదివించుకుంటూ, తల్లిదండ్రులకూ పట్టెడన్నం పెడుతున్నది.

ఎన్నో సవాళ్లు ఎదురయ్యాయి. అయినా నిరాశ చెందలేదు. కన్నీళ్లు దిగమింగుకుంటూ, సుడిగుండాలు దాటుకుంటూ కొత్త జీవితాన్ని ప్రారంభించింది. ఉన్నత విద్యాభ్యాసం చేసింది. తన కాళ్లపై తాను నిలబడింది. కొడుకును చదివించుకుంటూ, తల్లిదండ్రులకూ పట్టెడన్నం పెడుతున్నది. పెద్దపల్లి జిల్లా యైటింక్లయిన్‌ కాలనీకి చెందిన తులసి..తన జీవన పోరాటంలో కెమెరాను ఆయుధంగా మలుచుకున్నది.

జీవితం అనూహ్యం. మనం అనుకునేది ఒకటి. జరిగేది మరొకటి. తులసి జిందగీ కూడా విధి ఆడించే వింత నాటకంలో ఓ భాగమే. పెద్దపల్లి యైటింక్లయిన్‌ కాలనీకి చెందిన దమ్మాల వెంకటరమణ దంపతులకు ఇద్దరు కూతుళ్లు, ఒక కొడుకు. వెంకటరమణ సింగరేణి ఉద్యోగి. ఫొటోగ్రఫీ అతని ప్రవృత్తి. వారసత్వ ఉద్యోగాన్ని కొడుకుకు ఇచ్చినా, విరమణ తర్వాత కూడా కెమెరాను వదల్లేదు. ఆయన రెండో కూతురు తులసికి బాబు పుట్టాక భర్తతో ఇబ్బందులు తలెత్తాయి. గత ఎనిమిదేండ్లుగా పుట్టింట్లోనే ఉంటున్నది. ఉద్యోగాల కోసం ఎన్ని ప్రయత్నాలు చేసినా ఫలించలేదు. దీంతో నాన్న వృత్తినే తానూ స్వీకరించింది. ఎక్కడ ఏ ఈవెంట్‌ ఉన్నా.. ఠంచనుగా వాలిపోతుంది. ఫొటోలు, వీడియోల ఎడిటింగ్‌ కూడా తానే చేస్తుంది. ఆ పనితనం వల్లే పరిసర కాలనీల ఆర్డర్స్‌ అన్నీ తులసికే వస్తాయి. దీంతో పదిహేను మందితో ఓ బృందాన్ని ఏర్పాటు చేసుకుంది. మరోవైపు తన పన్నెండేండ్ల బాబు త్రిలోక్‌ను చదివించుకుంటున్నది. కన్నవారికి అండగానూ నిలుస్తున్నది. తన సృజనతో ఫొటోగ్రఫీలో అనేక అవార్డులు సొంతం చేసుకున్నది. తనిప్పుడు మహిళా ఫొటోగ్రాఫర్స్‌ అసోసియేషన్‌ రాష్ట్ర ప్రధాన కార్యదర్శి కూడా.