Visit:
– ఎక్సైజ్ శాఖ ఖమ్మం జిల్లా డిప్యూటీ కమిషనర్ సోమిరెడ్డి
కారేపల్లి, సెప్టెంబర్ 22 : మత్తు పదార్థాల వినియోగం వల్ల కలిగే అనర్థాలు, ఆరోగ్యంపై పడే దుష్ప్రభావాలపై ఎక్సైజ్ అండ్ ప్రొహిబిషన్ శాఖ కారేపల్లి సర్కిల్ ఆధ్వర్యంలో మంగళవారం కారేపల్లి మండల కేంద్రంలో గల ప్రభుత్వ జిల్లా పరిషత్ ఉన్నత పాఠశాలలో అవగాహన కార్యక్రమాన్ని నిర్వహించారు. ఈ కార్యక్రమానికి ప్రొహిబిషన్ అండ్ ఎక్సైజ్ డిపార్ట్మెంట్ ఖమ్మం జిల్లా డిప్యూటీ కమిషనర్ ఎం.సోమిరెడ్డి ముఖ్య అతిథిగా హాజరై విద్యార్థులకు మత్తు పదార్థాల వల్ల కలిగే నష్టాలను వివరించారు. మత్తు పదార్థాలకు అలవాటు పడడం వల్ల విద్యార్థుల చదువులు, ఆరోగ్యం, కుటుంబ జీవితం, భవిష్యత్పై తీవ్ర ప్రభావం పడుతుందని తెలిపారు.
విద్యార్థులు చెడు అలవాట్లకు దూరంగా ఉంటూ చదువుపై దృష్టి సారించాలని, తమ చుట్టూ ఉన్నవారిలోనూ మత్తు పదార్థాల విపరిణామాలపై అవగాహన కల్పించాలని సూచించారు. యువత మత్తు పదార్థాలకు ఆకర్షితులు కాకుండా తల్లిదండ్రులు, ఉపాధ్యాయులు, అధికారులు సమన్వయంతో పని చేయాల్సిన అవసరం ఉందన్నారు. ఈ కార్యక్రమంలో ఎక్సైజ్ సీఐ పి.లింగయ్య, ఉపాధ్యాయలు ఎం.సుడోమన్ రాజ్, సిహెచ్ సరిత, పి.శ్యాంప్రసాద్, సిబ్బంది, విద్యార్థులు, సంబంధిత శాఖ అధికారులు పాల్గొన్నారు.
