సంస్కరణల పేరిట విద్యార్థుల భవిష్యత్‌తో ప్రయోగాలా?

రాష్ట్రంలో ఇంటర్మీడియట్ విద్యా వ్యవస్థను పాఠశాల విద్యాశాఖలో విలీనం చేస్తూ 10+2 విధానాన్ని తీసుకురావాలని ముఖ్యమంత్రి రేవంత్ రెడ్డి సర్కారు తీసుకున్న నిర్ణయంపై అఖిల భారత యువజన సమాఖ్య తీవ్ర ఆందోళన వ్యక్తం చేసింది. ప్రభుత్వ విద్యను బలోపేతం చేయాల్సింది పోయి...

– ​ఇంటర్ విద్యా వ్యవస్థ రద్దు, పాఠశాలల విలీనం తగదు
– ​పేదలకు విద్యను దూరం చేసే నిర్ణయాలను వెంటనే వెనక్కి తీసుకోవాలి
– ​ఏఐవైఎఫ్ రాష్ట్ర సమితి సభ్యుడు ఎస్.కె. చాంద్ పాషా

​జూలూరుపాడు, నవంబర్ 12 : రాష్ట్రంలో ఇంటర్మీడియట్ విద్యా వ్యవస్థను పాఠశాల విద్యాశాఖలో విలీనం చేస్తూ 10+2 విధానాన్ని తీసుకురావాలని ముఖ్యమంత్రి రేవంత్ రెడ్డి సర్కారు తీసుకున్న నిర్ణయంపై అఖిల భారత యువజన సమాఖ్య తీవ్ర ఆందోళన వ్యక్తం చేసింది. ప్రభుత్వ విద్యను బలోపేతం చేయాల్సింది పోయి, విలీనాల పేరుతో వ్యవస్థను నిర్వీర్యం చేయడం దారుణమని ఏఐవైఎఫ్ రాష్ట్ర సమితి సభ్యుడు ఎస్.కె. చాంద్ పాషా గురువారం ఒక ప్ర‌క‌ట‌న‌లో విమర్శించారు. విద్యార్థుల భవిష్యత్‌ను అంధకారంలోకి నెట్టే ఈ నిర్ణయాన్ని ప్రభుత్వం తక్షణమే వెనక్కి తీసుకోవాలని ఆయన డిమాండ్ చేశారు. దశాబ్దాలుగా లక్షలాది మంది విద్యార్థుల ఉన్నత విద్యకు ఇంటర్మీడియట్ వ్యవస్థే పునాదిగా నిలుస్తోందని, కేవలం పరిపాలనా మార్పుల పేరుతో దీన్ని రద్దు చేయడం సరికాదన్నారు. ఎంపీసీ, బైపీసీ లాంటి గ్రూపుల ప్రత్యేకత.. జేఈఈ, నీట్, ఎంసెట్ వంటి జాతీయ, రాష్ట్ర స్థాయి పోటీ పరీక్షలకు సన్నద్ధం చేసే విధానం ఈ విలీనంతో దెబ్బతింటుందన్నారు.

ముఖ్యంగా మౌలిక సదుపాయాలు, ప్రయోగశాలల కోసం భారీగా పెట్టుబడులు పెట్టిన ప్రైవేట్ జూనియర్ కళాశాలల మనుగడ ప్రశ్నార్థకంగా మారుతుందని ఆవేదన వ్యక్తం చేశారు. ప్రభుత్వ, ప్రైవేట్ కళాశాలల్లో పనిచేస్తున్న వేలాది మంది కాంట్రాక్ట్, గెస్ట్ అధ్యాపకులు, ఇతర సిబ్బంది ఉద్యోగ భద్రత గాలిలో దీపంగా మారుతుందన్నారు. మరోవైపు ప్రభుత్వ పాఠశాలల విలీనం పేరుతో గ్రామీణ ప్రాంతాల్లో బడులను ఏకీకృతం చేస్తే.. పేద విద్యార్థులు చదువు కోసం కిలోమీటర్ల కొద్దీ నడవాల్సి వస్తుందని ఆయన గుర్తుచేశారు. దీనివల్ల భద్రతా, రవాణా సమస్యలు తలెత్తి ముఖ్యంగా ఆడబిడ్డలు, వికలాంగులు, దళిత, గిరిజన, మైనార్టీ విద్యార్థులు చదువుకు దూరమయ్యే ప్రమాదం ఉందన్నారు. పదో తరగతి తర్వాత విద్యార్థులు చదువు మానేయడానికి ప్రధాన కారణం.. పేదరికం, హాస్టళ్ల కొరత, ఫీజు రీయింబర్స్‌మెంట్, స్కాలర్‌షిప్‌ల జాప్యమేనని, ఈ మూల కారణాలను పరిష్కరించకుండా బడులను విలీనం చేస్తే డ్రాపౌట్స్ ఎలా తగ్గుతాయని ఆయన ప్రభుత్వాన్ని నిలదీశారు.