‘సింగరేణి సమస్యల పరిష్కారానికి ఏఐటీయూసీ రిలే నిరాహార దీక్షలు’

సింగరేణి కాలరీస్ వర్కర్స్ యూనియన్ (ఏఐటీయూసీ) ఆధ్వర్యంలో ఈ నెల 18, 19 తేదీల్లో తలపెట్టిన రిలే నిరాహార దీక్షలను జయప్రదం చేయాలని యూనియన్ నాయకులు పిలుపునిచ్చారు. శనివారం కొత్తగూడెంలోని శేషగిరిభవన్‌లో నిర్వహించిన ముఖ్య కార్యకర్తల సమావేశంలో...

– ఈ 18, 19 తేదీల్లో అన్ని జీఎం కార్యాలయాల ముందు దీక్షలు
– కార్మిక సమస్యల పరిష్కారమే లక్ష్యం
– యూనియ‌న్ నాయ‌కులు వంగ వెంకట్, జి.వీరస్వామి

రుద్రంపూర్, నవంబర్ 14 : సింగరేణి కాలరీస్ వర్కర్స్ యూనియన్ (ఏఐటీయూసీ) ఆధ్వర్యంలో ఈ నెల 18, 19 తేదీల్లో తలపెట్టిన రిలే నిరాహార దీక్షలను జయప్రదం చేయాలని యూనియన్ నాయకులు పిలుపునిచ్చారు. శనివారం కొత్తగూడెంలోని శేషగిరిభవన్‌లో నిర్వహించిన ముఖ్య కార్యకర్తల సమావేశంలో నాయకులు వంగ వెంకట్, జి.వీరస్వామి మాట్లాడారు. ఏఐటీయూసీ కేంద్ర నాయకత్వం తీసుకున్న నిర్ణయం మేరకు సింగరేణి వ్యాప్తంగా అన్ని జనరల్ మేనేజర్ కార్యాలయాల ఎదుట రెండు రోజుల పాటు రిలే నిరాహార దీక్షలు నిర్వహించనున్నట్లు తెలిపారు. అందులో భాగంగా కొత్తగూడెం ఏరియా జనరల్ మేనేజర్ కార్యాలయం ఎదుట నిర్వహించే రిలే నిరాహార దీక్షల్లో కార్మికులు, యూనియన్ నాయకులు, కార్యకర్తలు పెద్ద సంఖ్యలో పాల్గొని కార్యక్రమాన్ని విజయవంతం చేయాలని కోరారు. ప్రధానంగా మూడు డిమాండ్ల సాధన కోసం ఈ ఆందోళన కార్యక్రమాన్ని చేపడుతున్నట్లు నాయకులు వెల్లడించారు.

మొదటిగా ప్రతి నెలా మెడికల్ బోర్డు నిర్వహించి, గతంలో మాదిరిగా 100 శాతం డిపెండెంట్ ఉద్యోగాలు కల్పించాలని డిమాండ్ చేశారు. అదేవిధంగా ఇప్పటికే మెడికల్ ఫిట్ అయినప్పటికీ ఉద్యోగాల కోసం ఎదురుచూస్తున్న సుమారు 200 మంది డిపెండెంట్లకు వెంటనే నియామక పత్రాలు అందజేయాలని కోరారు. అదేవిధంగా టీఎస్ జెన్‌కో, ట్రాన్స్‌కో నుండి సింగరేణికి రావాల్సిన రూ.59,000 కోట్ల మొండి బకాయిలను రాష్ట్ర ప్రభుత్వం తక్షణమే చెల్లించాలని డిమాండ్ చేశారు. కార్మికుల సమస్యల పరిష్కారంలో ప్రభుత్వం, యాజమాన్యం చేస్తున్న జాప్యాన్ని వారి దృష్టికి తీసుకెళ్లడంతో పాటు, యూనియన్‌తో కుదుర్చుకున్న పెండింగ్ డిమాండ్ల సాధన కోసం ఈ రిలే నిరాహార దీక్షలు చేపడుతున్నట్లు నాయకులు తెలిపారు. కార్మికుల న్యాయమైన డిమాండ్ల సాధన కోసం నిర్వహిస్తున్న ఈ పోరాటంలో ప్రతి ఒక్కరూ భాగస్వాములై దీక్షలను విజయవంతం చేయాలని పిలుపునిచ్చారు. ఈ సమావేశంలో బ్రాంచ్ కార్యదర్శులు ఎస్.వి.రమణమూర్తి, జక్కుల గట్టయ్య, నాయకులు లక్ష్మీనారాయణ, చంద్రయ్య, మండల రాజేశ్వరరావు పాల్గొన్నారు.