Dog Attack | కుక్క దాడిలో రేకొండ సర్పంచ్‌తో పాటు ఎనిమిది మందికి గాయాలు

చిగురుమామిడి మండలంలోని రేకొండ గ్రామంలో కుక్క స్వైరవిహారం చేయడంతో సర్పంచ్‌తో పాటు ఎనిమిది మంది తీవ్రంగా గాయపడ్డారు. అలాగే గ్రామంలో పలువురిపై కూడా దాడి చేసేందుకు ప్రయత్నించింది.

Dog Attack | చిగురుమామిడి, నవంబర్ 9 : చిగురుమామిడి మండలంలోని రేకొండ గ్రామంలో కుక్క స్వైరవిహారం చేయడంతో సర్పంచ్‌తో పాటు ఎనిమిది మంది తీవ్రంగా గాయపడ్డారు. అలాగే గ్రామంలో పలువురిపై కూడా దాడి చేసేందుకు ప్రయత్నించింది. స్థానికుల కథనం ప్రకారం.. రేకొండ గ్రామంలో పలువురిపై కుక్క దాడి చేసి గాయపరిచింది. దీంతో వారు సర్పంచ్ అల్లెపు సంపత్‌కు సమాచారం అందించారు. దీంతో ఆయన వెంటనే స్పందించి కుక్కను పట్టుకునేందుకు ప్రయత్నించారు. ఈ క్రమంలో ఆ కుక్క సర్పంచ్‌పై కూడా దాడి చేసి గాయపరిచింది.

గాయపడిన వారిలో సర్పంచ్ అల్లెపు సంపత్‌తో పాటు దుడ్డేల రాజమ్మ, దుడ్డేల బూదమ్మ, మోర లచ్చవ్వ, మోర మధు, గందె సహర్ష్ తో పాటు మరో ఇద్దరు గాయపడ్డారు. కాగా గ్రామస్తుల సమాచారంతో గాయపడిన వారిని 108 అంబులెన్స్‌లో కరీంనగర్ ప్రభుత్వ ఆసుపత్రికి తరలించి చికిత్స అందిస్తున్నారు. గ్రామంలో కుక్కల బెడదపై గ్రామస్తులు ఆందోళన వ్యక్తం చేస్తున్నారు. అధికారులు వెంటనే స్పందించి తగిన చర్యలు తీసుకోవాలని కోరుతున్నారు.