ముక్కులో చెక్క‌పుల్ల‌లు.. వార‌మైనా గుర్తించ‌లేక‌పోయిన మ‌హిళ‌..!

Chopsticks in Woman nose: తైవాన్‌లో ఓ 29 ఏండ్ల మ‌హిళ ముక్కులో ఏకంగా రెండు చాప్‌స్టిక్స్ (ఆహారాన్ని గుచ్చి తిన‌డానికి ఉప‌యోగించే చెక్క పుల్ల‌లు) గుచ్చుకున్నా ఆమె వారం రోజుల దాకా గుర్తించ‌లేక‌పోయింది.

తైవాన్‌: సాధార‌ణంగా ముక్కులో చిన్న కురుపైనా ఎంతో అసౌక‌ర్యంగా ఉంటుంది. అది పూర్తిగా త‌గ్గిపోయే వ‌ర‌కు ఒక ర‌క‌మైన యాత‌న‌ను అనుభ‌వించాల్సి వ‌స్తుంది. కానీ తైవాన్‌లో ఓ 29 ఏండ్ల మ‌హిళ ముక్కులో ఏకంగా రెండు చాప్‌స్టిక్స్ (ఆహారాన్ని గుచ్చి తిన‌డానికి ఉప‌యోగించే చెక్క పుల్ల‌లు) గుచ్చుకున్నా ఆమె వారం రోజుల దాకా గుర్తించ‌లేక‌పోయింది. వివ‌రాల్లోకి వెళ్తే.. తైవాన్‌లో స‌ద‌రు మ‌హిళ‌కు, ఆమె సోద‌రికి రాత్రి డిన్న‌ర్ చేసే స‌మ‌యంలో గొడ‌వ‌ జ‌రిగింది.

ఇద్ద‌రి మ‌ధ్య మాటామాటా పెరుగ‌డంతో చివ‌రికి కొట్టుకునే దాకా వెళ్లింది. తినే ప్లేట్లు, గిన్నెల‌తోనే ఒక‌రినొక‌రు కొట్టుకున్నారు. దాంతో బాధిత మ‌హిళ ముక్కుపై వంట‌పాత్ర‌ల ముక్కలు గుచ్చుకుని స్వ‌ల్పంగా ర‌క్త‌స్రావం అయ్యింది. దాంతో ఆమె ఆస్ప‌త్రికి వెళ్ల‌గా.. వైద్యులు ఎక్స్‌రేలు తీసి చిన్నచిన్న ఇనుప ముక్క‌లు, చెక్క ముక్క‌లు తొల‌గించి పంపించారు. వారం రోజుల త‌ర్వాత ముక్కుపై గాయాలు పూర్తిగా మానిపోయాయి.

ఆ త‌ర్వాత బాధితురాలు గొడ‌వ జ‌రిగిన రోజు విరిగిపోయిన వ‌స్తువుల‌ను ప‌రిశీలించగా చాప్‌స్టిక్స్‌లో కొన్ని భాగాలు విరిగిపోయి ఉన్నాయి. అవి ఏమై ఉంటాయ‌నే అనుమానంతో అద్దంలో ముఖం చూసుకోగా త‌న ముక్కులో గ్రే రంగులో ఏదో వ‌స్తువు ఉన్న‌ట్లు క‌నిపించింది. దాంతో ఆమె వెంట‌నే ఆస్ప‌త్రికి వెళ్ల‌గా వైద్యులు స్కానింగ్ చేసి మ‌హిళ సైన‌స్‌లో రెండు చాప్‌స్టిక్ పీసులు ఉన్న‌ట్లు గుర్తించారు. శ‌స్త్రచికిత్స చేసి 1.4 ఇంచులు, 2 ఇంచులు పొడ‌వు ఉన్న రెండు చాప్‌స్టిక్ ముక్క‌ల‌ను తొల‌గించారు.

అయితే, వారం రోజుల‌పాటు చాప్‌స్టిక్ ముక్క‌లు త‌న ముక్కులో ఉన్నా మ‌హిళ‌కు నొప్పి తెలియ‌క‌పోవ‌డంపై వైద్యుల ఆశ్చ‌ర్యం వ్య‌క్తం చేశారు. సైన‌స్‌లో చాప్‌స్టిక్స్ ఉన్నా ఎందుకు నొప్పి తెలియ‌లేదో తెలుసుకునేందుకు అధ్య‌య‌నం చేశారు. ఆ కేస్ స్ట‌డీని జూన్ 24న ఎమ‌ర్జెన్సీ మెడిసిన్ అనే జ‌ర్న‌ల్‌లో ప్ర‌చురించారు.

ఇవి కూడా చదవండి..

అద్భుత‌మైన‌ స్టెప్పుల‌తో అద‌ర‌గొట్టిన వృద్ధుడు.. వైర‌ల్ వీడియో

ఆకాశంలో మ‌రో ఖ‌గోళ అద్భుతం..!

‘గిన్నిస్‌’కు ఎక్కిన గుర్రం బిగ్ జాక్‌ మృతి..!

వ‌రుడికి క‌ట్నంగా ఆక్సిజ‌న్..!

ఇంట‌ర్నెట్ తెచ్చిన తంటా.. చెట్టుపై నుంచి ఉపాధ్యాయుడి బోధ‌న‌..!

చేప‌ల కోసం వ‌ల వేస్తే కొండచిలువ చిక్కింది..!