‘ప్రవర్తన’ ఆధారంగా తాలిబన్‌ ప్రభుత్వాన్ని గుర్తిస్తాం: రష్యా

కాబూల్‌: ప్రవర్తన ఆధారంగా తాలిబన్‌ ప్రభుత్వాన్ని గుర్తిస్తామని రష్యా తెలిపింది. తాలిబన్‌ ప్రభుత్వ పని తీరును గమనించిన తర్వాత దీనిపై నిర్ణయం తీసుకుంటామని పేర్కొంది. రష్యా అధ్యక్షుడు వ్లాదిమిర్ పుతిన్ నియమించిన ఆఫ్ఘనిస్థాన్‌ ప్రత్యేక ప్రతినిధి జమీర్ కబులోవ్ ఈ మేరకు సోమవారం చెప్పారు. ‘ఆఫ్ఘనిస్థాన్‌లో కొత్త ప్రభుత్వాన్ని గుర్తించడం లేదా గుర్తించకపోవడం అనే దానిపై రష్యా తొందరపడదు. తాలిబాన్ తిరుగుబాటుదారులు నాయకత్వం వహిస్తారని భావిస్తున్నాం’ అని అన్నారు. ఐక్యరాజ్య సమితి భద్రతా మండలి సోమవారం అత్యవసర సమావేశానికి పిలుపునిచ్చిన నేపథ్యంలో ఆయన ఈ వ్యాఖ్యలు చేశారు. కాగా, తాలిబన్లు బలవంతంగా ఆఫ్ఘనిస్థాన్‌ను తమ ఆధీనంలోకి తెచ్చుకోవడాన్ని ఐరాసలోని మెజార్టీ సభ్య దేశాలు ఖండించాయి.

మరోవైపు తాలిబన్లు హింసకు పాల్పడవచ్చన భయాందోళనల నేపథ్యంలో ప్రజలు ఆ దేశాన్ని వీడేందుకు ప్రయత్నిస్తున్నారు. ఈ నేపథ్యంలో ఆఫ్ఘనిస్థాన్‌లోని రష్యా రాయబారి తాలిబన్‌ నాయకత్వంతో మంగళవారం సమావేశంకానున్నారు. ప్రధానంగా రష్యా రాయబార కార్యాలయం అధికారులు, సిబ్బంది భద్రతపై తాలిబన్లతో చర్చించనున్నారు.