Syrian Girl | తమ్ముడికి రక్షణ కవచంలా అక్క.. బ్రేవ్‌ గర్ల్‌ అంటూ డబ్ల్యూహెచ్‌వో చీఫ్‌ ప్రశంస..!

ఏడేళ్ల సిరియన్‌ బాలిక శిథిలాల కింద చిక్కుకుని కూడా.. తన తమ్ముడికి రక్షణ కవచంలా కాపాడే ప్రయత్నం చేసింది. తాజాగా ఆ చిన్నారిపై ప్రపంచ ఆరోగ్య సంస్థ (డబ్ల్యూహెచ్‌వో) చీఫ్‌ టెడ్రోస్‌ అధనామ్‌ ప్రశంసించారు.

Syrian Girl | తుర్కియే, సిరియా దేశాల్లోని భూకంప ప్రభావిత ప్రాంతాల్లో ఎటుచూసినా విషాద దృశ్యాలే దర్శనమిస్తున్నాయి. అయిన వాళ్లను కోల్పోయిన వారి ఆక్రందనలతో ఆ ప్రాంతాలు మార్మోగుతున్నాయి. శిథిలాల కింద నుంచి బయటపడుతున్న మృతదేహాలతో ఆయా ప్రదేశాలు మరుభూమిని తలపిస్తున్నాయి. ఆ ప్రదేశాల్లో కొన్ని దృశ్యాలైతే హృదయాలను ద్రవింపజేస్తున్నాయి. ఇదే సమయంలో ఇద్దరు చిన్నారులకు సంబంధించిన ఓ వీడియో ఇప్పుడు ప్రతి ఒక్కరి మనసులను కలచివేస్తోంది.

ఏడేళ్ల సిరియన్‌ బాలిక శిథిలాల కింద చిక్కుకుని కూడా.. తన తమ్ముడికి రక్షణ కవచంలా కాపాడే ప్రయత్నం చేసింది. ఇందుకు సంబంధించిన వీడియో, ఫొటోలు ఇప్పటికే వైరల్‌ అయ్యాయి. ఆ అమ్మాయి తన తమ్ముడిని కాపాడుకునేందుకు చేసిన ప్రయత్నం చూసిన వారంతా చిన్నారిని ప్రశంసిస్తున్నారు. ‘అద్భుతం జరిగింది. ఆమె చాలా గొప్ప అక్క. ధైర్యవంతురాలు’ అంటూ పలువురు నెటిజన్లు సైతం కొనియాడుతున్నారు. తాజాగా ఆ చిన్నారిపై ప్రపంచ ఆరోగ్య సంస్థ (డబ్ల్యూహెచ్‌వో) చీఫ్‌ టెడ్రోస్‌ అధనామ్‌ ప్రశంసించారు. ఇందుకు సంబంధించిన వీడియోను ట్విట్టర్‌లో షేర్‌ చేస్తూ.. ‘ఈ ధైర్యవంతురాలైన అమ్మాయికి అంతులేని ప్రశంసలు..’ అంటూ రాసుకొచ్చారు.

Endless admiration for this brave girl.pic.twitter.com/anliOTBsy1

— Tedros Adhanom Ghebreyesus (@DrTedros) February 8, 2023

కాగా, ‘శిథిలాల కింద 17 గంటల పాటు తమ్ముడి తలకు చేయి అడ్డుగా పెట్టి కాపాడిన 7 ఏళ్ల బాలిక సురక్షితంగా బయటపడింది. ఈ ఫొటోను ఎవరూ షేర్‌ చేయట్లేదు. ఒకవేళ మరణించి ఉంటే వైరల్‌ అయి ఉండేది. దయచేసి సానుకూల సందేశాలను కూడా షేర్‌ చేయండి’ అంటూ ఐక్యరాజ్యసమితి ప్రతినిధి మహమ్మద్‌ సఫా తన ట్విట్టర్‌ ఖాతాలో పోస్టు చేసిన విషయం తెలిసిందే.