Australia | ఆస్ట్రేలియా ల్యాబొరేటరీ నుంచి ప్రాణాంతక వైరస్‌ల వయల్స్‌ మిస్సింగ్‌

ఆస్ట్రేలియాలోని క్వీన్స్‌లాండ్‌లో ఉన్న పబ్లిక్‌ హెల్త్‌ వైరాలజీ ల్యాబొరేటరీ నుంచి ప్రాణాంతక సజీవ వైరస్‌లు ఉన్న వందలాది వయల్స్‌ మాయం కావడం కలకలం రేపుతున్నది. నిరుడు ఆగస్టులోనే ఇవి మాయం కాగా తాజాగా విషయం వెలుగులోకి వచ్చింది.

Australia | న్యూఢిల్లీ: ఆస్ట్రేలియాలోని క్వీన్స్‌లాండ్‌లో ఉన్న పబ్లిక్‌ హెల్త్‌ వైరాలజీ ల్యాబొరేటరీ నుంచి ప్రాణాంతక సజీవ వైరస్‌లు ఉన్న వందలాది వయల్స్‌ మాయం కావడం కలకలం రేపుతున్నది. నిరుడు ఆగస్టులోనే ఇవి మాయం కాగా తాజాగా విషయం వెలుగులోకి వచ్చింది. అయితే, ఇవి అదృశ్యమయ్యాయా? లేదంటే ధ్వంసమయ్యాయా? అన్న విషయాన్ని అధికారులు కూడా స్పష్టంగా చెప్పలేకపోతున్నారు.

దీనిపై ఆస్ట్రేలియా ప్రజారోగ్యశాఖతోపాటు క్వీన్స్‌ల్యాండ్‌ ఆరోగ్యశాఖ విచారణకు ఆదేశించాయి. ల్యాబ్‌ నుంచి మాయమైన వాటిలో హెండ్రా వైరస్‌, లిసావైరస్‌, హంటా వైరస్‌ సహా వివిధ రకాల అంటువ్యాధులకు చెందిన 323 వయల్స్‌ ఉన్నాయి. హెండ్రా వైరస్‌ జూనోటిక్‌ అంటే.. జంతువుల నుంచి మనుషులకు సోకే వైరస్‌. దీనిని ఆస్ట్రేలియాలో మాత్రమే గుర్తించారు. హంటా వైరస్‌ అనేది వివిధ రకాల వైరస్‌లతో కూడినది.