ఐదేళ్ల కిందట నోస్‌ రింగ్‌ కోల్పోయిన వ్యక్తి… ఊపిరితిత్తుల్లో కనుగొన్న డాక్టర్లు

ఎక్స్‌ రే చూసి లికిన్స్‌ చాలా ఆశ్చర్యపోయాడు. ఆ నోస్‌ రింగ్‌ కోసం తాను తెగ వెతికానని చెప్పాడు. చివరకు తన ఊపిరితిత్తుల్లోకి అది చేరుకున్నట్లు తెలుసుకుని షాక్‌ అయ్యాడు.

వాషింగ్టన్‌: ముక్కుకు ధరించే రింగ్‌ను ఒక వ్యక్తి ఐదేళ్ల కిందట కోల్పోయాడు. అయితే ఇటీవల అతడు అనారోగ్యానికి గురి కావడంతో ఆ రింగ్‌ అతడి ఊపిరితిత్తుల్లో ఉన్నట్లు డాక్టర్లు గుర్తించారు. సర్జరీ ద్వారా దానిని బయటకు తీశారు. అరుదైన ఈ సంఘటన అమెరికాలో జరిగింది. 35 ఏళ్ల జోయ్ లికిన్స్, తన ముక్కుకు రింగ్‌ ధరించేవాడు. ఐదేళ్ల కిందట అతడు నిద్ర నుంచి లేచిన తర్వాత అది కనిపించలేదు. ఆ మంచం అంతటా వెతికినా ఫలితం లేకపోయింది. ఒకవేళ పొరపాటున మింగి ఉంటానని అతడు అనుకున్నాడు. ఆ నోస్‌ రింగ్‌పై ఆశలు వదులుకున్నాడు.

కాగా, జోయ్ లికిన్స్‌కు ఇటీవల రాత్రి వేళ బాగా దగ్గు వచ్చింది. దగ్గుతున్నప్పుడు వెనక వైపు చాలా నొప్పిగా అనిపించింది. దీంతో అతడ్ని హాస్పిటల్‌లో అడ్మిట్‌ చేశారు. న్యుమోనియా లక్షణాలుగా తొలుత వైద్యులు భావించారు. అయితే ఎక్స్‌ రే తీసిన తర్వాత వారికి అసలు విషయం తెలిసింది. కుడి ఊపిరితిత్తు పైభాగంలో అతడు పోగొట్టుకున్న నోస్‌ రింగ్ ఉంది. ఈ ఎక్స్‌ రే చూసి లికిన్స్‌ చాలా ఆశ్చర్యపోయాడు. ఆ నోస్‌ రింగ్‌ కోసం తాను తెగ వెతికానని చెప్పాడు. చివరకు తన ఊపిరితిత్తుల్లోకి అది చేరుకున్నట్లు తెలుసుకుని షాక్‌ అయ్యాడు.

మరోవైపు జోయ్ లికిన్స్‌ ఊపిరితిత్తిలో ఉన్న ఆ నోస్‌ రింగ్‌ను సర్జరీ ద్వారా డాక్టర్లు బయటకు తీశారు. అయితే దీనిని తాను ఎప్పటికీ ధరించనని అతడు తెలిపాడు. గుర్తుగా తన వద్ద ఉంచుకుంటానని చెప్పాడు. ప్రస్తుతం తన వద్ద 12 నోస్‌ రింగ్స్‌ ఉన్నాయని అతడు వెల్లడించాడు.