దుబాయ్: విదేశీయులను ఆకట్టుకునే ఉదారవాద ముద్రను మరింతగా పెంచుకునే చర్యల్లో భాగంగా యునైటెడ్ అరబ్ ఎమిరేట్స్ (యూఏఈ) తాజాగా సినిమాల సెన్సార్ను మొత్తంగా ఎత్తివేస్తున్నట్టు ప్రకటించింది. సాంప్రదాయిక ఇస్లామిక్ విశ్వాసాలకు విరుద్ధంగా ఉండే అంశాలను సినిమాల నుంచి తొలగించే బదులుగా ‘21 ప్లస్’ అనే కొత్త వయోవర్గాన్ని ప్రవేశపెడుతున్నట్టు ఎమిరేట్ మీడియా నియంత్రణ ప్రాధికార సంస్థ వెల్లడించింది. యూఏఈ థియేటర్లలో అంతర్జాతీయ సినిమాలను యథాతథంగా ప్రదర్శించవచ్చని ట్విట్టర్లో పేర్కొన్నది. నగ్నత్వం, స్వలింగ సంపర్కం, లైంగిక దృశ్యాల వంటివి గతంలో యూఏఈలో సెన్సార్ చేసేవారు. ప్రతి పదిమందిలో తొమ్మిది మంది విదేశీయులే ఉండే యూఏఈలో అరబ్బు రాజ్యాలకు భిన్నమైన సంస్కరణలు చాలానే తెచ్చారు. అంతర్జాతీయ వాణిజ్య మార్కెట్లకు అనుగుణంగా వచ్చే ఏడాది నుంచి శుక్రవారానికి బదులుగా శని, ఆదివారాల వారాంతపు సెలవులు కూడా అమలు చేయనున్నారు.