Tonga Volcano | పసిఫిక్ ద్వీపకల్పం టోంగాలో అగ్నిపర్వతం విస్ఫోటనం చెందింది. సముద్రం అడుగున ఉన్న భారీ అగ్నిపర్వతం పేలిపోయింది. హవాయి, అలస్కా, యూఎస్ పసిఫిక్ కోస్ట్ ప్రాంతాల్లో సునామీ హెచ్చరికలు జారీ అయ్యాయి. అగ్నిపర్వతం విస్ఫోటనం తర్వాత భారీగా పొగ, బూడిద ఎగిసిపడ్డాయి. ఆ సమయంలో టోంగాకు 800 కిలోమీటర్ల దూరంలో ఉన్న ఫిజీలో దాదాపు 8 నిమిషాల పాటు.. పెద్ద ఉరుముల్లాంటి శబ్దాలు వినిపించాయి.
అగ్నిపర్వతం విస్ఫోటనం చెందిన ప్రాంతానికి 65 కిలోమీటర్ల దూరంలోని టోంగా రాజధాని నుకులోఫాలో 1.2 మీటర్ల ఎత్తులో అలలు ఎగిసిపడ్డాయి. పశ్చిమ తీరానికి సునామీ హెచ్చరికలను అమెరికా వాతావరణ విభాగం జారీ చేసింది. సునామీ హెచ్చరికల దృష్ట్యా యూఎస్ పశ్చిమ తీరంలోని బీచ్లను మూసివేశారు. సునామీ హెచ్చరికల నేపథ్యంలో ప్రజలంతా ఎత్తైన ప్రదేశాలకు వెళ్లాలని అధికారులు సూచించారు. టోంగాలోని చర్చిని, అనేక నివాసాలను అలలు ముంచెత్తాయి. దీంతో స్థానికులు తీవ్ర భయాందోళనకు గురయ్యారు.
టోంగాలో లక్షా ఐదు వేల మంది నివసిస్తున్నారు. అయితే ఇక్కడ 2014లో సముద్రం అడుగున భారీ అగ్నిపర్వతం విస్ఫోటనం సంభవించింది. 2015లోనూ అగ్నిపర్వతం విస్ఫోటనం చెంది, అనేక మంది ప్రాణాలు కోల్పోయారు. ప్రస్తుత విస్ఫోటనం కారణంగా.. టోంగాలో ఎంతమంది ప్రాణాలు కోల్పోయారనే అంశంపై స్పష్టత లేదని అక్కడి అధికారులు వెల్లడించారు.