ఉక్రెయిన్ యుద్ధం అనేది ఆసియా దేశాల సమస్య కూడా అని శుక్రవారం ఫ్రాన్స్ అధ్యక్షుడు ఇమ్మాన్యుయేల్ మక్రాన్ అన్నారు. కాబట్టి ఆసియా దేశాలు ఉక్రెయిన్పై రష్యా దాడిని వ్యతిరేకిస్తూ ఒక అంగీకారానికి రావాలని ఆయన కోరారు. థాయ్లాండ్ రాజధాని బ్యాంకాక్లో జరిగిన ఆసియా పసిఫిక్ ఎకనామిక్ కో-ఆపరేషన్ సదస్సుకి మక్రాన్ హాజరయ్యారు. ఈ సందర్భంగా వ్యాపార వేత్తలతో మక్రాన్ మాట్లాడుతూ.. ఉక్రెయిన్ యుద్ధం అనేది యూరోపియన్ దేశాల సమస్య మాత్రమే కాదు. ఆసియా దేశాల సమస్య కూడా. ఎందుకంటే..ఈ యుద్ధం కారణంగా ప్రపంచమంతా అస్థిరత నెలకొనే అవకాశం ఉంది. అందుకని ఉమ్మడి అంగీకారం కోసం ఫ్రాన్స్ ప్రయత్నిస్తోందని తెలిపారు.
ఈ ఏడాది ఫిబ్రవరి 24వ తేదీన రష్యా సైన్యం, ఉక్రెయిన్ మీద యుద్ధానికి దిగింది. ఈ యుద్ధంలో ఇప్పటివరకూ ఇరువైపులా లక్షల్లో సైనికులు చనిపోయారు. రష్యా-ఉక్రెయిన్ యుద్ధం, యూరప్లో అతిపెద్ద శరణార్థుల సంక్షోభానికి దారి తీసింది. ఉక్రెయినపై రష్యా దాడిని ఐక్యరాజ్యసమితి ఖండిస్తూ తీర్మానం ప్రవేశపెట్టింది. ఉక్రెయిన్ నుంచి రష్యా సైన్యాన్ని వెనక్కి తీసుకోవాలని డిమాండ్ చేసింది. అయితే.. ఈమధ్యే జీ 20 సదస్సు జరుగుతుండగానే రష్యా ఉక్రెయిన్ మీద క్షిపణుల వర్షం కురిపించింది.