యూరప్‌ నుంచి బలగాల ఉపసంహరణ.. అమెరికా అధ్యక్షుడు ట్రంప్‌ యోచన

ఇరాన్‌తో యుద్ధం విషయంలో నాటో కూటమి దేశాల వైఖరిపై ఆగ్రహంతో ఉన్న అమెరికా అధ్యక్షుడు ట్రంప్‌ యూరప్‌ నుంచి తమ బలగాలను ఉపసంహరించే ఆలోచన చేస్తున్నట్టు వైట్‌హౌస్‌కు చెందిన ఓ సీనియర్‌ అధికారి వెల్లడించారు.

వాషింగ్టన్‌, ఏప్రిల్‌ 10 : ఇరాన్‌తో యుద్ధం విషయంలో నాటో కూటమి దేశాల వైఖరిపై ఆగ్రహంతో ఉన్న అమెరికా అధ్యక్షుడు ట్రంప్‌ యూరప్‌ నుంచి తమ బలగాలను ఉపసంహరించే ఆలోచన చేస్తున్నట్టు వైట్‌హౌస్‌కు చెందిన ఓ సీనియర్‌ అధికారి వెల్లడించారు. ఇరాన్‌తో యుద్ధంతోపాటు గ్రీన్‌లాండ్‌ను స్వాధీనం చేసుకోవాలనే తన ఆకాంక్షల పట్ల నాటో దేశాలు తనకు మద్దతునివ్వకపోవడం పట్ల ట్రంప్‌ కినుక వహించారు. ముఖ్యంగా ఇరాన్‌ కబ్జాలో ఉన్న హొర్ముజ్‌ జలసంధిని తెరిపించే విషయంలో నాటో కూటమి వైఫల్యంపై ట్రంప్‌ మండిపడుతున్నారు.

మరోవైపు నాటో దేశాల కారణంగా గ్రీన్‌లాండ్‌ను స్వాధీనం చేసుకోవాలన్న తన కల నెరవేరకపోవడంపై కూడా ఆయన ఆగ్రహంతో ఉన్నారు. ఈ నేపథ్యంలో ఐరోపా ఖండం నుంచి అమెరికన్‌ బలగాల ఉపసంహరణపై తన సలహాదారులతో సంప్రదించినట్టు ఆ అధికారి తెలిపారు. ఇప్పటికైతే ఎటువంటి నిర్ణయం తీసుకోలేదని, పెంటగాన్‌ కూడా బలగాల ఉపసంహరణకు ఎటువంటి పటిష్ఠమైన ప్రణాళికను రూపొందించలేదని పేర్కొన్నారు.