Visit:
UK PM : పశ్చిమాసియా (West Asia) ఘర్షణలతో హర్మూజ్ జలసంధి (Strait of Hormuz) లో తీవ్ర అంతరాయాలు నెలకొన్నాయి. ఈ క్రమంలో యూకే ప్రధాని (UK PM) కీర్ స్టార్మర్ (Keir Starmer) కీలక వ్యాఖ్యలు చేశారు. హర్మూజ్ జలసంధిని తిరిగి తెరిచే మార్గాలపై చర్చించేందుకు ప్రపంచస్థాయి సదస్సు నిర్వహిస్తామని ఆయన ప్రకటించారు. ఇందుకోసం అందుబాటులో ఉన్న ప్రతి దౌత్యమార్గాన్ని పరిశీలిస్తున్నామని అన్నారు. అయితే ఇరాన్ యుద్ధంలోకి మాత్రం ఎట్టి పరిస్థితుల్లోనూ దిగబోమని తేల్చిచెప్పారు.
హర్మూజ్ జలసంధి విషయంలో తన మాట వినని యూకేకు అమెరికా సాయం చేయబోదన్న ట్రంప్ హెచ్చరికలపై స్టార్మర్ స్పందిస్తూ.. ఎవరు ఎంత ఒత్తిడి తీసుకువచ్చినా బ్రిటిష్ జాతీయ ప్రయోజనాల కోసమే ఆలోచిస్తానన్నారు. అది తమ యుద్ధం కాదని, అందువల్లే అందులోకి వెళ్లదలుచుకోలేదని స్పష్టంచేశారు. ప్రస్తుత సంఘర్షణలతో యూకే భవిష్యత్తుపై గణనీయమైన ప్రభావం పడుతోందని.. ఇంధన సరఫరాకు అంతరాయం కలగడంవల్ల జీవన వ్యయం పెరుగుతుందని అన్నారు.
అయినప్పటికీ ఈ సంక్షోభాన్ని ఎదుర్కోవడానికి దేశం సిద్ధంగా ఉందని స్టార్మర్ చెప్పారు. ప్రస్తుత సమయంలో అమెరికాతో కంటే సహచర ఐరోపా దేశాలతో బలమైన సంబంధాలు కలిగి ఉండటమే బ్రిటన్కు ప్రయోజనకరమని ఆయన అభిప్రాయం వ్యక్తంచేశారు.
