బ్యాంకాక్ : వాలెంటైన్స్ డేకు ముందు థాయ్లాండ్ ప్రభుత్వం 9.5 కోట్ల కండోమ్లను ఉచితంగా పంపిణీ చేస్తోంది. లైంగిక వ్యాధులకు, టీనేజర్ల గర్భధారణకు చెక్ పెడుతూ సురక్షిత శృంగారం కోసం థాయ్లాండ్ ఈ నిర్ణయం తీసుకుంది. ఫిబ్రవరి 1 నుంచి యూనివర్సల్ హెల్త్కేర్ కార్డుదారులు ఏడాది పాటు వారానికి 10 ఉచిత కండోమ్లు పొందుతారని థాయ్లాండ్ ప్రతినిధి రచద ధనదిరెక్ వెల్లడించారు.
గోల్డ్కార్డుదారులకు ఉచిత కండోమ్లను పంచే క్యాంపెయిన్తో వ్యాధుల నియంత్రణతో పాటు ప్రజారోగ్యాన్ని కాపాడవచ్చని ఆమె పేర్కొన్నారు. సిఫిలిస్, ఎయిడ్స్, గనేరియా వంటి శృంగారం ద్వారా వ్యాప్తి చెందే (ఎస్టీడీ) వ్యాధుల నియంత్రణకు నాలుగు సైజ్ల్లో ఉండే ఈ కండోమ్లు ఫార్మసీలతో పాటు దేశవ్యాప్తంగా ఆస్పత్రుల్లో అందుబాటులో ఉంటాయని థాయ్లాండ్ నేషనల్ హెల్త్ సెక్యూరిటీ కార్యాలయం (ఎన్హెచ్ఎస్ఓ) వెల్లడించింది.
2021లో థాయ్లాండ్లో ప్రబలిన ఎస్టీడీల్లో యాభై శాతం పైగా కేసులు గనేరియాగా నమోదయ్యాయని ప్రభుత్వ గణాంకాలు తెలిపాయి. 15 నుంచి 24 ఏండ్ల లోపు యువత అధికంగా ఈ వ్యాధుల బారినపడుతోందని వెల్లడైంది. 15 నుంచి 19 ఏండ్ల వయసున్న ప్రతి 1000 మంది థాయ్ బాలికల్లో 2021లో 24.4 మంది శిశువులకు జన్మనిచ్చారని గణాంకాలు స్పష్టం చేశాయి.