పుతిన్‌తో మాట్లాడిన తర్వాత… రష్యా రక్షణ మంత్రికి గుండెపోటు: ఉక్రెయిన్ మంత్రి

కీవ్‌: రష్యా అధ్యక్షుడు పుతిన్‌తో మాట్లాడిన తర్వాత ఆ దేశ రక్షణ మంత్రి సెర్గీ షోయిగుకు గుండెపోటు వచ్చిందని ఉక్రెయిన్‌ మంత్రి అంటోన్ గెరాష్చెంకో ఆరోపించారు. ఉక్రెయిన్‌పై చేపట్టిన ప్రత్యేక సైనిక చర్యలో వైఫల్యంపై పుతిన్‌ ఆగ్రహం వ్యక్తం చేశారని చెప్పారు. ఈ వైఫల్యానికి ఆయనే కారణమంటూ పుతిన్‌ మండిపడటంతో యుద్ధానికి సూత్రధారి అయిన రష్యా రక్షణ మంత్రి సెర్గీ షోయిగుకు గుండెపోటు వచ్చిందని ఉక్రెయిన్ మంత్రి అంటోన్‌ తన షేస్‌బుక్‌ పోస్ట్‌లో పేర్కొన్నారు. అందుకే ఆయన మార్చి 11 నుంచి బహిరంగంగా కనిపించలేదన్నారు.

మరోవైపు రష్యా రక్షణ మంత్రి సెర్గీ షోయిగు కొన్ని రోజులుగా కనిపించకపోవడంతో పలు ఊహాగానాలు వెలువడ్డాయి. ఉక్రెయిన్‌పై యుద్ధంలో వైఫల్యం, కీలక నగరాలైన ఖర్కీవ్‌, కీవ్‌ను రష్యా సైన్యం స్వాధీనం చేసుకోలేకపోవడంపై పుతిన్‌ ఆయనను శిక్షించినట్లు వదంతులు వచ్చాయి. దీంతో రష్యా ప్రతినిధి దీనిపై స్పందించారు. ఉక్రెయిన్‌పై ప్రత్యేక సైనిక ఆపరేషన్‌ వల్ల రక్షణ మంత్రి బిజీగా ఉన్నారని తెలిపారు.

ఈ నేపథ్యంలో మార్చి 24న రష్యా రక్షణ మంత్రి టీవీలో కనిపించారు. ఉక్రెయిన్‌ యుద్ధంపై అధ్యక్షుడు పుతిన్‌, జాతీయ భద్రతా మండలికి ఆయన టీవీ కాన్ఫరెన్స్‌ ద్వారా వివరిస్తున్నట్లుగా అందులో ఉన్నది. అయితే ఆయన ఎలాంటి ప్రసంగం చేయలేదు. దీంతో ఇది పాత వీడియోనా అన్న అనుమానాలను కొన్ని మీడియా సంస్థలు వ్యక్తం చేశాయి.