Luna-25: చంద్రుడిపైకి లూనా-25 ఎగిరేది ఎప్పుడో చెప్పిన ర‌ష్యా

Luna-25: చంద్రుడిపై దిగే స్పేస్‌క్రాఫ్ట్ లూనా-25 ప్ర‌యోగా తేదీని ర‌ష్యా ప్ర‌క‌టించింది. జూలై 13వ తేదీన దీన్ని ప్ర‌యోగించ‌నున్నారు. కొన్ని ద‌శాబ్ధాల త‌ర్వాత ర‌ష్యా మూన్ ప‌రీక్ష‌కు సిద్ధ‌మైంది.

మాస్కో: చంద్రుడి మీద‌కు ర‌ష్యా మూన్ ల్యాండ‌ర్(Moon Lander) లూనా-25(Luna-25)ను పంప‌నున్న‌ది. ఆ ప్ర‌యోగ తేదీని ఇవాళ ర‌ష్యా స్పేస్ ఏజెన్సీ రాస్కాస్‌మ‌స్(Roscosmos) ప్ర‌క‌టించింది. లూనా-25 స్పేస్‌క్రాఫ్ట్‌ను జూలై 13వ తేదీన లాంచ్ చేయ‌నున్న‌ట్లు రాస్కాస్‌మ‌స్ తెలిపింది. నిజానికి గ‌త ఏడాది సెప్టెంబ‌ర్‌లో ఈ ప్ర‌యోగం జ‌ర‌గాల్సి ఉంది. కానీ సాంకేతిక కార‌ణాల వ‌ల్ల దాన్ని వాయిదా వేశారు. స్పేస్‌క్రాఫ్ట్‌లోని ఏవియానిక్స్‌లో లోపాలు ఉన్న‌ట్లు రాస్కాస్‌మ‌స్ చీఫ్ యూరి బొరిసోవ్ తెలిపారు.

1976 త‌ర్వాత చంద్రుడి మీద‌కు ర‌ష్యా లూనార్ ప్రోబ్‌ను పంపిస్తోంది. ఎన్ని అవాంత‌రాలు వ‌చ్చినా లూనా-25 ప్ర‌యోగాన్ని స‌మ‌ర్థ‌వంగా చేప‌ట్ట‌నున్న‌ట్లు రాస్కాస్‌మ‌స్ తెలిపింది. 30 కేజీల సైంటిఫిక్ ఎక్విప్మెంట్‌తో లూనా నింగికి ఎగ‌ర‌నున్న‌ది. చంద్రుడిపై అనేక పరీక్ష‌ల‌ను ఆ మిష‌న్ ద్వారా చేప‌ట్ట‌నున్నారు.

చంద్రుడి ద‌క్షిణ ద్రువంలో ఉన్న బొగుస్ల‌విస్కీ క్రేట‌ర్ వ‌ద్ద లూనా-25 ల్యాండ్ అయ్యే అవ‌కాశాలు ఉన్నాయి. మ‌రో వైపు 2025లో చంద్రుడిపై అమెరికా త‌న వ్యోమ‌గాముల‌ను దింపేందుకు ప్ర‌య‌త్నిస్తోంది. ఇటీవ‌ల చైనా కూడా వ‌రుస‌గా కొన్ని లూనార్ ప్ర‌యోగాలు చేప‌ట్టింది. ఇక ఇండియా కూడా ఆగ‌స్టులో చంద్ర‌యాన్-3 ప్ర‌యోగాన్ని చేప‌ట్ట‌నున్న విష‌యం తెలిసిందే.