మాస్కో: రష్యాలో మరోసారి కరోనా విజృంభిస్తున్నది. గత వారం రోజులుగా పాజిటివ్ కేసుల సంఖ్య పెరుగుతున్నది. గురువారం కొత్తగా రికార్డుస్థాయిలో 40,096 కరోనా కేసులు, 1,159 మరణాలు నమోదైనట్లు ఆ దేశ ఆరోగ్య అధికారులు తెలిపారు. ఈ నేపథ్యంలో కరోనాను ఎదుర్కొనేందుకు అత్యవసరం కాని సేవలను 11 రోజుల పాటు నిలిపివేశారు. పాఠశాలలు, కిండర్ గార్టెన్లతో సహా రిటైల్ అవుట్లెట్లు, రెస్టారెంట్లు, క్రీడా, వినోదానికి సంబంధించిన వాటిని మూసివేశారు. కేవలం ఆహారం, మందులు, నిత్యావసర వస్తువులు విక్రయించే దుకాణాలు మాత్రమే తెరిచేందుకు అనుమతించారు. కరోనా తీవ్రతను నియంత్రించేందుకు అక్టోబర్ 30 నుంచి నవంబర్ 7 వరకు వారం రోజులు దేశవ్యాప్తంగా ఉద్యోగులకు పెయిడ్ హాలిడేను ఆ దేశ అధ్యక్షుడు పుతిన్ ఇటీవల ప్రకటించారు.
మరోవైపు కరోనా టీకా అభివృద్ధి, ఉత్పత్తిలో ముందున్న రష్యా, ఆ దేశ ప్రజలకు టీకాలు అందించలేకపోతున్నది. ఇప్పటి వరకు 32 శాతం జనాభా మాత్రమే వ్యాక్సిన్ పొందారు. టీకా తీసుకునేందుకు రష్యా ప్రజలు చొరవ చూపడం లేదు. ఈ నేపథ్యంలో నిర్లక్ష్యం వీడి వ్యాక్సినేషన్ కోసం ప్రజలు ముందుకు రావాలని అధ్యక్షుడు పుతిన్ ఇటీవల విజ్ఞప్తి చేశారు.