Russia | సొంత నగరంపైనే రష్యా యుద్ధ విమానం దాడి.. ధ్వంసమైన భవనాలు

ఉక్రెయిన్‌ (Ukraine) సరిహద్దుల్లోని సొంత నగరంపైనే రష్యా (Russia) యుద్ధవిమానం (Warplane) దాడికి పాల్పడింది. దీంతో భారీ పేలుడు సంభవించడంతోపాటు పెద్ద సంఖ్యలో భవనాలు ధ్వంసమయ్యాయి. ఉక్రెయిన్‌ సరిహద్దుకు సమీపంలో ఉన్న బెల్గొరోడ్‌ (Belgorod) నగరంపై రష్యాకు చెందిన సుఖోయ్‌ ఎస్‌యూ-34 (Sukhoi Su-34) యుద్ధ విమానం ప్రమాదవశాత్తు బాంబును పేల్చింది.

న్యూఢిల్లీ: ఉక్రెయిన్‌ (Ukraine) సరిహద్దుల్లోని సొంత నగరంపైనే రష్యా (Russia) యుద్ధవిమానం (Warplane) దాడికి పాల్పడింది. దీంతో భారీ పేలుడు సంభవించడంతోపాటు పెద్ద సంఖ్యలో భవనాలు ధ్వంసమయ్యాయి. ఉక్రెయిన్‌ సరిహద్దుకు సమీపంలో ఉన్న బెల్గొరోడ్‌ (Belgorod) నగరంపై రష్యాకు చెందిన సుఖోయ్‌ ఎస్‌యూ-34 (Sukhoi Su-34) యుద్ధ విమానం ప్రమాదవశాత్తు బాంబును పేల్చింది. దీంతో నగరంలో పలు భవనాలు దెబ్బతిన్నాయని రష్యా రక్షణ మంత్రిత్వ శాఖ వెల్లడించింది. పేలుడు కారణంగా నగరంలోని ప్రధాన వీధుల్లో ఒకదానిపై 20 మీటర్ల పొడవున్న గొయ్యి (Crater) ఏర్పడిందని బెల్గోరోడ్ ప్రాంతీయ గవర్నర్ వ్యాచెస్లావ్ గ్లాడ్‌కోవ్ (Vyacheslav Gladkov) తెలిపారు. ఈ నేపథ్యంలో నగరంలో అత్యవసర పరిస్థితి విధించామన్నారు.

ఎయిర్‌ఫోర్స్‌కు చెందిన సుఖోయ్‌ ఎస్‌యూ-34 యుద్ధ విమానం బెల్గొరోడ్‌ మీదుగా వెళ్తున్నప్పుడు ప్రమాదవశాత్తు బాంబులను పేల్చిందని రక్షణ శాఖ ఓ ప్రకటనలో తెలిపింది. అది ఉక్రెయిన్‌ సరిహద్దుకు కొద్ది దూరంలో ఉందని వెల్లడించింది. ఈ పేలుడుతో ఇద్దరు మహిళలు గాయపడ్డారని పేర్కొన్నది. అయితే ఈ ఘటనకు కారణమైన ఆయుధం ఏదనే విషయమై మంత్రిత్వ శాఖ స్పష్టతనివ్వలేదు. దాడి నేపథ్యంలో పలు భవనాలు దెబ్బతిన్నాయి. పెద్ద సంఖ్యలో కార్లు ధ్వంసమయ్యాయి.