Naftali Bennett | జెలెన్‌స్కీని చంపనని పుతిన్‌ నాకు మాటిచ్చారు : ఇజ్రాయెల్‌ మాజీ ప్రధాని

ఉక్రెయిన్‌ అధ్యక్షుడు జెలెన్‌స్కీని చంపబోనని రష్యా అధ్యక్షుడు పుతిన్‌ తనకు మాటిచ్చారని.. ఇజ్రాయెల్‌ మాజీ ప్రధాని నఫ్టాలీ బెన్నెట్‌ వెల్లడించారు. ఈ విషయాన్ని జెలెన్‌స్కీకి కూడా ఫోన్‌ ద్వారా తెలియజేసినట్లు బెన్నెట్‌ చెప్పారు.

Naftali Bennett | రష్యా-ఉక్రెయిన్‌ మధ్య నెలకొన్న యుద్ధం ఏడాదిగా కొనసాగుతూనే ఉంది. ఉక్రెయిన్‌పై క్రెమ్లిన్‌ సైన్యం బాంబులు, క్షిపణులతో విరుచుకుపడుతోంది. అయితే, యుద్ధం ప్రారంభమైన సమయంలో ఉక్రెయిన్‌ అధ్యక్షుడు వొలొదొమిర్‌ జెలెన్‌స్కీ (Volodymyr Zelenskyy)ని చంపేందుకు తీవ్ర ప్రయత్నాలు జరుగుతున్నాయంటూ వార్తలు వచ్చాయి. అయితే, జెలెన్‌స్కీని చంపబోనని రష్యా అధ్యక్షుడు పుతిన్‌ (Vladimir Putin) తనకు మాటిచ్చారని.. ఇజ్రాయెల్‌ మాజీ ప్రధాని నఫ్టాలీ బెన్నెట్‌ (Naftali Bennett) తాజాగా వెల్లడించారు.

ఇరుదేశాల మధ్య నెలకొన్న యుద్ధాన్ని ఆపేందుకు కొందరు నేతలు మధ్యవర్తిత్వం వహించిన విషయం తెలిసిందే. అందులో ఇజ్రాయెల్‌ మాజీ ప్రధాని నఫ్టాలీ బెన్నెట్‌ కూడా ఒకరు. గతంలో ఆయన స్వయంగా మాస్కోకు వెళ్లి పుతిన్‌ను కలిసి యుద్ధం ఆపాలని విజ్ఞప్తి చేశారు. ఆ సమావేశానికి సంబంధించిన పలు ఆసక్తికర విషయాలను బెన్నెట్‌ తాజాగా ఓ ఇంటర్వ్యూలో వెల్లడించారు.

‘గతేడాది మార్చిలో మాస్కో పర్యటనకు వెళ్లా. అక్కడ పుతిన్‌తో సమావేశం సందర్భంగా జెలెన్‌స్కీ విషయాన్ని ప్రస్తావించా. ‘మీరు జెలెన్‌స్కీని చంపాలనుకుంటున్నారా..?’ అని అడిగా. అందుకు పుతిన్‌ స్పందిస్తూ.. ‘లేదు’ అని సమాధానమిచ్చారు. ‘జెలెన్‌స్కీని చంపనని మీరు నాకు మాటిస్తున్నారా?’ అని మరోసారి అడిగా. ‘జెలెన్‌స్కీని నేను చంపను’ అని పుతిన్ మళ్లీ స్పష్టంగా చెప్పారు’ అని బెన్నెట్‌ వివరించారు.

ఈ విషయాన్ని జెలెన్‌స్కీకి కూడా ఫోన్‌ ద్వారా తెలియజేసినట్లు బెన్నెట్‌ చెప్పారు. ‘నేను చెప్పేది విను.. మీటింగ్ నుంచి ఇప్పుడే వచ్చాను. పుతిన్‌ నాకు మాటిచ్చాడు. అతను నిన్ను చంపడు’ అని తెలియజేశానని తెలిపారు. దీంతో ‘నిజంగానా?’ అని జెలెన్‌స్కీ అడిగారని, తాను 100 శాతం నిజమని చెప్పానని వివరించారు.

అయితే, బెన్నెట్ వ్యాఖ్యలపై ఉక్రెయిన్‌ విదేశాంగ మంత్రి దిమిద్రో కుబేలా స్పందించారు. పుతిన్‌ను నమ్మలేమని అన్నారు. ‘మోసపోకండి.. అతను మహా అబద్ధాలకోరు. అతన్ని నమ్మలేం. అతను ఏదైనా చేయనని మాటిచ్చాడంటే.. అది కచ్చితంగా అతని ప్లాన్‌లో భాగమే అయి ఉంటుంది’ అని అన్నారు.