న్యూయార్క్ : ర్యాపర్ ఫ్రెంచ్ మోంటాన్ మ్యూజిక్ వీడియో షూటింగ్ జరుగుతుండగా కాల్పుల మోత కలకలం రేపింది. అమెరికాలోని ఫ్లోరిడా స్టేట్ మియామి గార్డెన్స్లో రెస్టారెంట్ వద్ద దుండగులు గురువారం పలువురిపై కాల్పులు జరిపారు. ఈ ఘటన జరిగిన సమయంలో ఆ ప్రాంతంలో ర్యాపర్ ఫ్రెంచ్ మోంటానా మ్యూజిక్ వీడియో చిత్రీకరణ జరుగుతోంది.
లికింగ్ రెస్టారెంట్ పార్కింగ్ ప్రదేశంలో షూటింగ్ జరుగుతుండగా అక్కడకు సమీపంలో కొందరి మధ్య వాగ్వాదం జరిగిందని, ఆపై పది నుంచి 15 గన్షాట్స్ వినిపించాయని మియామి గార్డెన్స్ పోలీసులు తెలిపారు. కాల్పుల కలకలంతో ప్రజలు తలోదిక్కు పారిపోయారని ప్రత్యక్ష సాక్షులు పేర్కొన్నారు. కాగా ఈ ఘటనలో పదిమందికి గాయాలయ్యాయని స్ధానిక వార్తా చానెల్స్ వెల్లడించాయి.
ఘటనా ప్రాంతానికి చేరుకున్న పోలీసులు, అధికారులు సహాయక చర్యలను ముమ్మరం చేశారు. కాల్పుల ఘటనతో సమీపంలోని రెస్టారెంట్లు, వాణిజ్య సంస్ధలను మూసివేశారు. ఘటనపై దర్యాప్తు చేపట్టామని, ఇప్పటివరకూ ఎవరినీ అరెస్ట్ చేయలేదని పోలీసులు తెలిపారు.