మంకీపాక్స్‌ వ్యాప్తిపై ఆందోళన… ప్రపంచ ఆరోగ్య అత్యవసర పరిస్థితిగా WHO ప్రకటన

వాషింగ్టన్‌: మంకీపాక్స్‌ క్రమంగా ప్రపంచ వ్యాప్తంగా వ్యాపిస్తున్నది. ఇప్పటి వరకు 75 దేశాల్లో 16 వేలకుపైగా కేసులు నమోదయ్యాయి. ఈ నేపథ్యంలో ప్రపంచ ఆరోగ్య సంస్థ (WHO) మరింతగా ఆందోళన చెందుతోంది. మంకీపాక్స్‌ను ప్రపంచ ఆరోగ్య అత్యవసర పరిస్థితిగా శనివారం ప్రకటించింది. ప్రపంచవ్యాప్తంగా అన్ని ప్రాంతాలలో మంకీపాక్స్ ప్రమాదం మధ్యస్థంగా ఉందని WHO చీఫ్‌ డాక్టర్ టెడ్రోస్ అధనామ్ ఘెబ్రేయేసస్ తెలిపారు. అయితే యూరోపియన్ ప్రాంతంలో మాత్రం ప్రమాదం ఎక్కువగా ఉందని అంచనా వేశారు. కొత్త విధానాల్లో ప్రపంచ వ్యాప్తంగా మరింతగా విస్తరించే ముప్పు ఉందన్నారు. ఈ నేపథ్యంలో మంకీపాక్స్‌ను ప్రపంచ ఆరోగ్య అత్యవసర పరిస్థితిగా ప్రకటిస్తున్నట్లు వెల్లడించారు.

కాగా, మంకీపాక్స్‌ వైరస్‌పై పోరాటానికి ప్రపంచ దేశాల మధ్య సమన్వయం అవరసమని టెడ్రోస్ స్పష్టం చేశారు. మశూచి టీకాలు కొంత రక్షణ కలిగిస్తాయని తెలిపారు. అయితే ఈ వైరస్‌ వ్యాప్తిని పూర్తిగా అరికట్టేందుకు కొత్త టీకాలు అభివృద్ధి చేయాల్సి ఉందన్నారు. మరోవైపు బవేరియన్ నార్డిక్ తయారు చేసిన మశూచి వ్యాక్సిన్ ‘ఇమ్వానెక్స్’ను మంకీపాక్స్‌పై పోరాటానికి యూరోపియన్ యూనియన్ డ్రగ్ రెగ్యులేటర్ శుక్రవారం సిఫార్సు చేసింది.