అత్యాధునిక ఏఐ నమూనాలు ఆపండి.. దిగ్గజ కంపెనీలను డిమాండ్‌ చేస్తూ అమెరికాలో భారీ నిరసన

అత్యాధునిక ఏఐ నమూనాల అభివృద్ధిని ఆపాలని డిమాండ్‌ చేస్తూ డజన్ల కొద్దీ నిరసనకారులు ఈ నెల 21న అమెరికాలోని శాన్‌ఫ్రాన్సిస్కోలో భారీ నిరసన ప్రదర్శన చేపట్టారు.

శాన్‌ఫ్రాన్సిస్కో : అత్యాధునిక ఏఐ నమూనాల అభివృద్ధిని ఆపాలని డిమాండ్‌ చేస్తూ డజన్ల కొద్దీ నిరసనకారులు ఈ నెల 21న అమెరికాలోని శాన్‌ఫ్రాన్సిస్కోలో భారీ నిరసన ప్రదర్శన చేపట్టారు. ఆంత్రోపిక్‌, ఓపెన్‌ఏఐ, ఎక్స్‌ఏఐ కార్యాలయాల వెలుపల నిర్వహించిన ఈ కార్యక్రమంలో ఆ మూడు కంపెనీల సీఈవోలు ఫ్రాంటియర్‌ ఏఐ మోడల్స్‌ డెవలప్‌మెంట్‌ ఆపుతామనే హామీ ఇవ్వాలని నిరసనకారులు డిమాండ్‌ చేశారు.

సినీ దర్శకుడు, ఏఐ సేఫ్టీ పరిశోధకుడు మైకేల్‌ ట్రజ్జి ఈ నిరసనలకు నేతృత్వం వహించారు. అమెరికా ప్రభుత్వం కృత్రిమ మేధ(ఏఐ) విధానాన్ని జాతీయం చేయాలనుకుంటున్నది. దానికి దిగ్గజ కంపెనీలు సాయం చేసే అవకాశం ఉంది. ఈ నేపథ్యంలో ‘స్టాప్‌ ఏఐ రేస్‌’ గ్రూప్‌ ఆందోళనలు చేపట్టింది.