Joe Biden: ఏమి తిన్నా జాగ్ర‌త్త‌గా ఉంటా.. ప్రిగోజిన్ అంశంపై జోకేసిన బైడెన్‌

Joe Biden: ఒక‌వేళ తానే ప్రిగోజిన్ అయితే, అప్పుడు తినే ఆహారం పట్ల తాను జాగ్ర‌త్త‌గా ఉండేవాడిన‌ని బైడెన్ అన్నారు. త‌న‌కు ఇచ్చే మెనూ ప‌ట్ల త‌న దృష్టిని నిలిపేవాడిన‌న్నారు. ప్రిగోజిన్ గురించి మాట్లాడుతూ.. ర‌ష్యాలో అత‌ని భ‌విష్య‌త్తు ఎలా ఉంటుందో చెప్ప‌లేమ‌ని వైట్‌హౌజ్‌లో బైడెన్ పేర్కొన్న‌ట్లు తెలుస్తోంది.

వాషింగ్ట‌న్‌: ర‌ష్యా అధ్య‌క్షుడు పుతిన్‌కు వ్య‌తిరేకంగా వాగ్న‌ర్ గ్రూపు చీఫ్ ప్రిగోజిన్ సైనిక తిరుగుబాటు చేసిన విష‌యం తెలిసిందే. అయితే పుతిన్ వార్నింగ్‌తో అత‌ను వెన‌క్కి త‌గ్గాడు. కానీ ఇప్ప‌టి వ‌ర‌కు మ‌ళ్లీ ప్రిగోజిన్ ఆచూకీ లేదు. రోస్తోవ్ న‌గ‌రాన్ని జూన్ 24వ తేదీన ప్రిగోజిన్ వీడాడు. ఆ త‌ర్వాత ఆయ‌న ఎక్క‌డికి వెళ్లారో తెలియ‌దు. ప్రిగోజిన్ ఆచూకీ తెలియ‌ద‌ని, కానీ బ‌హుశా అత‌నికి విషం ఇచ్చి ఉంటార‌ని అమెరికా అధ్య‌క్షుడు జో బైడెన్(Joe Biden) జోక్ వేశారు. గురువారం ఆయ‌న స్థానిక మీడియాతో మాట్లాడుతూ ఈ వ్యాఖ్య‌లు చేశారు.

ఒక‌వేళ తానే ప్రిగోజిన్ అయితే, అప్పుడు భుజించే ఆహారం పట్ల తాను జాగ్ర‌త్త‌గా ఉండేవాడిన‌ని బైడెన్ అన్నారు. త‌న‌కు ఇచ్చే మెనూ ప‌ట్ల త‌న దృష్టిని నిలిపేవాడిన‌న్నారు. ప్రిగోజిన్ గురించి మాట్లాడుతూ.. ర‌ష్యాలో అత‌ని భ‌విష్య‌త్తు ఎలా ఉంటుందో చెప్ప‌లేమ‌ని వైట్‌హౌజ్‌లో బైడెన్ పేర్కొన్న‌ట్లు తెలుస్తోంది.

ఇటీవ‌ల ఉక్రెయిన్‌పై యుద్ధం ప్ర‌క‌టించిన త‌ర్వాత ర‌ష్యాకు అనుకూలంగా వాగ్న‌ర్ ప్రైవేటు సైన్యం పోరాటం చేసింది. అయితే ఇటీవ‌ల త‌మ ద‌ళానికి ర‌ష్యా ఆయుధాలు ఇవ్వ‌డం లేద‌ని ప్రిగోజిన్ ఆరోపించారు. ర‌ష్యాపై తిరుగుబాటు చేస్తున్న‌ట్లు ప్ర‌క‌టించారు. కానీ పుతిన్ వార్నింగ్ ఇవ్వ‌డంతో రెండు రోజుల‌కే ప్రిగోజిన్ త‌న ప్లాన్ మార్చుకున్నారు.