డిస్నీ, వార్న‌ర్‌, సోనీ చిత్రాల‌కు ర‌ష్యాలో బ్రేక్‌

లాస్ ఏంజిల్స్‌: హాలీవుడ్‌కు చెందిన మూడు మేటి స్టూడియోలు త‌మ సినిమాల‌ను ర‌ష్యాలో రిలీజ్ చేయడం లేదు. వార్న‌ర్ బ్ర‌ద‌ర్స్‌, వాల్ట్ డిస్నీ, సోనీ పిక్చ‌ర్స్ సంస్థ‌లు త‌మ రాబోయే చిత్రాల‌ను ర‌ష్యాలో రిలీజ్ చేయ‌డంలేద‌ని స్ప‌ష్టం చేశాయి. ఈ వార‌మే భారీ బ‌డ్జెట్ మూవీ ద బ్యాట్‌మెన్ ప్ర‌పంచ‌వ్యాప్తంగా థియేట‌ర్ల‌లో రిలీజ్‌కానున్న‌ది. వాస్త‌వానికి వార్న‌ర్‌, డిస్నీ, సోనీ సంస్థ‌లు.. త్వ‌ర‌లో కొన్ని పెద్ద సినిమాల‌ను రిలీజ్ చేయ‌నున్నాయి. అంత‌ర్జాతీయ బాక్సాఫీసు మార్కెట్‌పై ఉక్రెయిన్ వార్ ప్ర‌భావం ప‌డే అవ‌కాశాలు ఉన్న‌ట్లు విశ్లేష‌కులు చెబుతున్నారు. ఈ శుక్ర‌వార‌మే ద బ్యాట్‌మెన్ సినిమా ప్ర‌పంచ‌వ్యాప్తంగా రిలీజ్‌కానున్న‌ది. ఉత్త‌ర అమెరికాతో పాటు ప‌లు దేశాల్లో ఈ సినిమా రిలీజ్‌కు రెఢీ అయ్యింది. వాల్ట్ డిస్నీ రూపొదిస్తున్న ట‌ర్నింగ్ రెడ్ చిత్రాన్ని నిజానికి మార్చి 10వ తేదీన ర‌ష్యాలో రిలీజ్ చేయాల్సి ఉంది. కానీ కేవ‌లం అమెరికాలోనే ఆ ఫిల్మ్‌ను రిలీజ్ చేసేందుకు ప్లాన్ వేశారు. మార్బియ‌స్ చిత్రం రిలీజ్‌ను ర‌ష్యాలో వాయిదా వేస్తున్న‌ట్లు సోనీ సంస్థ తెలిపింది. వాస్త‌వానికి ర‌ష్యాలో హాలీవుడ్ చిత్రాల‌కు పెద్ద క్రేజీ ఉండ‌దు. కానీ బాక్సాఫీసు మార్కెట్‌లో ఆ దేశం టాప్ టెన్‌లో ఉంటుంది.