Greenery | పరిసరాల పచ్చదనం.. ఎముకలకు బలం!

పచ్చదనానికి, ఎముక పటుత్వానికి సంబంధం ఏంటి? పరిసరాల పచ్చదనం అధికంగా ఉన్న చోట నివసించే వారి ఎముకలు బలంగా ఉంటాయా? అంటే అవుననే అంటున్నారు బెల్జియం పరిశోధకులు.

Greenery | హస్సెల్ట్‌ (బెల్జియం), జనవరి 14: పచ్చదనానికి, ఎముక పటుత్వానికి సంబంధం ఏంటి? పరిసరాల పచ్చదనం అధికంగా ఉన్న చోట నివసించే వారి ఎముకలు బలంగా ఉంటాయా? అంటే అవుననే అంటున్నారు బెల్జియం పరిశోధకులు. ‘వయసుపై పర్యావరణ ప్రభావం’ అనే అంశంపై బెల్జియంలో 4-6 ఏండ్ల వయస్సు కలిగిన 327 మంది పిల్లలపై ఫ్లాండర్స్‌ రీజియన్‌లో ఈ పరిశోధనలు నిర్వహించారు. ముఖ్యంగా వారి ఎముకల పటిష్ఠతను పరిశీలించారు. ఎముకలోని ఖనిజ సాంద్రత కనుగొనడానికి వారు క్వాంటిటేటివ్‌, అల్ట్రా సోనోగ్రఫీ లాంటి విధానాలను వినియోగించారు.

ఎముకల సాంద్రత పిల్లల వయసు, బరువుతో పెరుగుతుందని… విటమిన్లు తీసుకోవడం, పాలు తాగడం, లింగం, బరువు, స్క్రీన్‌ టైం, సప్లిమెంట్లు వంటి ఇతర కారకాల ప్రభావం పెద్దగా ఉండదని తెలుసుకున్నారు. 25 శాతం పచ్చదనం అధికంగా ఉన్న ప్రాంతాలకు వెయ్యి మీటర్ల పరిధిలో నివసించే పిల్లల ఎముకల సాంద్రత తక్కువగా ఉండే అవకాశాలు 66 శాతం తగ్గింది. అంటే పచ్చదనం పిల్లల ఎముకల పటిష్టతపై విశిష్ట ప్రభావం చూపింది. అయితే అధ్యయనంలో పాల్గొన్న వారి లింగ భేదాలను ఇందులో పరిశీలించ లేదు. చిన్నతనంలోనే ఎముకల్లో బలం ఉంటే తర్వాత జీవితంలో మీరు మరింత దృఢంగా మారుతారని పరిశోధనలో పాల్గొన్న హస్సెల్ట్‌ యూనివర్సితీ ప్రొఫెసర్‌ టిమ్‌ నారోట్‌ పేర్కొన్నారు.