US Shooting | చర్చిలో కాల్పులు జరిపి నిప్పుపెట్టాడు.. నలుగురు మృతి

అమెరికాలో కాల్పులు కలకలం (US Shooting) సృష్టించాయి. మిషిగన్‌లోని ఓ చర్చిలో దుండగుడు జరిపిన కాల్పుల్లో నలుగురు మృతి చెందారు. మరో 8 మంది గాయపడ్డారు.

వాషింగ్టన్‌‌: అమెరికాలో కాల్పులు కలకలం (US Shooting) సృష్టించాయి. మిషిగన్‌లోని ఓ చర్చిలో దుండగుడు జరిపిన కాల్పుల్లో నలుగురు మృతి చెందారు. మరో 8 మంది గాయపడ్డారు. ఆదివారం మిషిగన్‌ రాష్ట్రంలోని గ్రాండ్‌ బ్లాంక్‌లోని మోర్మాన్‌ చర్చిని కారుతో ఢీకొట్టిన దుండగుడు, కాల్పులకు తెగబడ్డాడు. అనంతరం నిప్పుపెట్టాడు. చర్చి మంటల్లో చిక్కుకుపోవడంతో ఆ ప్రాంతంలో దట్టమైన పొగలు కమ్ముకున్నాయి. ఆ సమయంలో చర్చిలో వందల మంది ఉన్నారు. ఈ ఘటనలో నలుగురు అక్కడికక్కడే చనిపోగా, ఎనమిది మంది గాయపడ్డారని, నిందితుడు హతమయ్యాడని పోలీసులు చెప్పారు.

నిందితుడిని థామస్‌ జాకబ్‌ స్యాన్‌ఫోర్డ్‌ (40)గా గుర్తించామని, అతడు గతంలో యూఎస్‌ మెరైన్‌లో పనిచేశాడని తెలిపారు. అయితే ఈ ఘటనలో ఎంతమంది గాయపడ్డారనే విషయమై పోలీసులు స్పష్టత నివ్వడం లేదు. కాగా, ఈ ఘటనను అధ్యక్షుడు డొనాల్డ్‌ ట్రంప్‌ తీవ్రంగా ఖండించారు. దేశంలోని క్రిస్టియాన్లను లక్ష్యంగా చేసుకుని దాడికి పాల్పడ్డారని చెప్పారు. ఇలాంటి హింసాత్మక ఘటనలు వెంటనే ఆగిపోవాలన్నారు. మృతుల ఆత్మకు శాంతి చేకూరాలని ప్రార్థిస్తున్నాని, వారి కుటుంబాలకు సానుభూతి తెలిపారు.