బిట్‌కాయిన్‌కు ఎల్ సాల్వ‌డార్ చ‌ట్ట‌బ‌ద్ద‌త‌.. క్రిప్టో క‌రెన్సీతో ఇక లావాదేవీలు

శాన్ సాల్వ‌డార్: బిట్‌కాయిన్‌కు ఎల్ సాల్వ‌డార్ దేశం చ‌ట్ట‌బ‌ద్ద‌త క‌ల్పించింది. ప్ర‌పంచంలో క్రిప్టోక‌రెన్సీకి చ‌ట్ట‌బ‌ద్ద‌త క‌ల్పించిన మొట్ట‌మొద‌టి దేశంగా ఎల్ సాల్వ‌డార్ నిలిచింది. ఇవాళ కాంగ్రెస్‌లో జ‌రిగిన ఓటింగ్‌లో 62 ఓట్లు అనుకూలంగా ప‌డ్డాయి. ఇక ఆ దేశంలో లావాదేవీల కోసం బిట్‌కాయిన్‌ను న్యాయ‌బ‌ద్దంగా వాడుకోవ‌చ్చు. బిట్‌కాయిన్ చ‌ట్టానికి ఆమోదం తెలుపుతూ ఆ దేశ ఉభ‌య‌స‌భ‌లు అనుకూలంగా ఓటేశాయి. బిట్‌కాయిన్ చ‌ట్టంపై ఓటింగ్‌కు వెళ్లాలంటూ అధ్యక్షుడు న‌యిబ్ బుక్లీ బుధ‌వారం ఆ బిల్లును కాంగ్రెస్‌కు పంపారు. ఎటువంటి ఆంక్ష‌లు లేకుండా చ‌ట్ట‌బ‌ద్దంగా బిట్‌కాయిన్ చెల్లింపులు జ‌ర‌గాల‌న్న ఉద్దేశంతో చ‌ట్టాన్ని రూపొందిచిన‌ట్లు ప్ర‌భుత్వం పేర్కొన్న‌ది.

ఇక నుంచి బిట్‌కాయిన్ రూపంలో ధ‌ర‌ల‌ను వెల్ల‌డించ‌నున్నారు. ప‌న్నుల‌ను కూడా క్రిప్టో రూపంలో చెల్లించ‌వ‌చ్చు. ప్ర‌భుత్వ ఆమోదం ద‌క్కినా.. నిజానికి ఎల్ సాల్వ‌డార్ దేశం ఎలా బిట్‌కాయిన్ లావాదేవీల‌ను జ‌రుపుతుందో ఇంకా స్ప‌ష్టం కావ‌డం లేదు. అమెరికా డాల‌ర్‌తో ఎక్స్‌చేంజ్ రేటును బిట్‌కాయిన్‌తో జ‌రుపువ‌చ్చు అని కొత్త చ‌ట్టం ప్ర‌తిపాదించింది. ఎల్ సాల్వ‌డార్‌లో అధికారికంగా యూఎస్ డాల‌ర్‌ను క‌రెన్సీగా వాడుతున్నారు. బిట్‌కాయిన్ లావాదేవీల గురించి ప్ర‌జ‌ల‌ను చైత‌న్యప‌ర‌చ‌నున్న‌ట్లు ప్ర‌భుత్వం వెల్ల‌డించింది.